காமன்வெல்த் ஹாக்கி: அரையிறுதியில் இந்தியா தோல்வி

காமன்வெல்த் ஆடவர் ஹாக்கியில் பி பிரிவில் முதலிடம் பெற்ற இந்தியா, ஏ பிரிவில் 2-ம் இடம் பெற்ற நியூஸிலாந்தை எதிர்கொண்டது. இந்திய அணி வெல்லும் என்று எதிர்பார்க்கப்பட்ட இந்த ஆட்டத்தில் நியூஸிலாந்து 13 நிமிடத்துக்குள் அடுத்தடுத்து கோல்கள் அடித்து 2-0 என முன்னிலை பெற்று ஆச்சர்யத்தை அளித்தது. 

பெனால்டி ஸ்டிரோக் மூலமாக தனது முதல் கோலை அடித்தது இந்தியா. எனினும் இடைவேளையின்போது நியூஸிலாந்து 2-1 என முன்னிலை பெற்றிருந்தது. 

ஆட்டத்தின் மூன்றாவது பகுதியில் பெனால்டி கார்னர் மூலம் தனது மூன்றாவது கோலை அடித்து வெற்றியை உறுதி செய்தது நியூஸிலாந்து. இதனால் மூன்றாவது இடைவேளையின்போது நியூஸிலாந்து அணியே முன்னிலை பெற்றிருந்தது. 

ஆட்டத்தின் 55-வது நிமிடத்தில் இந்திய அணி கோலடித்து பரபரப்பை ஏற்படுத்தியது. பெனால்டி கார்னர் மூலம் ஹர்மன்ப்ரீத் அந்த கோலை அடித்தார். எனினும் இதன்பிறகு இந்திய வீரர்கள் எவ்வளவு முயன்றும் இன்னொரு கோலை அடிக்கமுடியாமல் போனது. இதனால் 3-2 என்ற கோல் கணக்கில் வென்று நியூஸிலாந்து இறுதிச்சுற்றுக்கு முன்னேறியுள்ளது. 

தங்கம் வெல்லும் என்று எதிர்பார்க்கப்பட்ட இந்திய அணி அரையிறுதியில் தோற்று ரசிகர்களை ஏமாற்றியுள்ளது. இதையடுத்து இந்திய அணி வெண்கலப் பதக்கத்துக்கான போட்டியில் பங்கேற்கவுள்ளது.

கடந்த 5-ம் தேதி முதல் காமன்வெல்த் போட்டிகள் கோல்ட்கோஸ்ட் நகரில் நடைபெற்று வருகின்றன. 71 நாடுகளைச் சேர்ந்த 4500-க்கு மேற்பட்ட வீரர், வீராங்கனைகள் பங்கேற்றுள்ளனர். இந்தியா சார்பில் 226 பேர் கொண்ட குழு பங்கேற்றுள்ளது. பளு தூக்குதல், துப்பாக்கி சுடுதல், மல்யுத்தம், பாட்மிண்டன், டேபிள் டென்னிஸ் உள்ளிட்டவற்றில் தங்கம் வென்று இந்திய வீரர்கள் சாதனை புரிந்து வருகின்றனர்.