பியோங்சாங் குளிர்கால ஒலிம்பிக் போட்டியில் ஃபிகர் ஸ்கேட்டிங் பிரிவில் கனடா ஜோடி தங்கப் பதக்கம் வென்றது. இந்த ஒலிம்பிக்கில் கனடா இதுவரை 5 பதக்கங்கள் வென்றுள்ள நிலையில், இது அந்நாட்டுக்கு கிடைத்துள்ள முதல் தங்கப் பதக்கமாகும். இதே நாளில் கனடா தனது 2-ஆவது தங்கத்தையும் வென்றது.
23-ஆவது குளிர்கால ஒலிம்பிக் போட்டிகள் தென் கொரியாவின் பியோங்சாங் நகரில் தொடங்கி நடைபெற்று வருகிறது. பதக்கத்துக்கான போட்டிகள் யாவும் கடந்த சனிக்கிழமை தொடங்கின. இந்நிலையில், 3-ஆவது நாளான திங்கள்கிழமை பையத்லான், ஃபிகர் ஸ்கேட்டிங், ஃப்ரீஸ்டைல் ஸ்கையிங், ஸ்கை ஜம்பிங், ஸ்னோபோர்டு, ஸ்பீடு ஸ்கேட்டிங் ஆகிய 6 பிரிவுகளில் பதக்கப் போட்டிகள் நடைபெற்றன.
இதில் ஃபிகர் ஸ்கேட்டிங் போட்டியானது காங்னியூங் நகரில் உள்ள பனிச்சறுக்கு ஆட்ட மைதானத்தில் நடைபெற்றது. இப்போட்டியில் கனடாவின் டெசா விர்சு-ஸ்காட் மொயர் ஜோடி 118.10 புள்ளிகளுடன் முதலிடம் பிடித்து தங்கத்தை கைப்பற்றியது.
பனியில் சறுக்கியவாறு சுமார் நான்கரை நிமிடங்கள் நடனம் நிகழ்த்திய டெசா-ஸ்காட் ஜோடிக்கு இது 3-ஆவது ஒலிம்பிக் போட்டியாகும். இதே போட்டியில் ஒலிம்பிக் கொடியின் கீழ் போட்டியிட்ட ரஷியாவின் எகாடெரினா பாப்ரோவா-டிமிட்ரி சோலோவீவ் ஜோடி வெள்ளிப் பதக்கம் வெல்ல, அமெரிக்காவின் மாயா ஷிபுடானி-அலெக்ஸ் ஷிபுடானி ஜோடி வெண்கலப் பதக்கம் வென்றது.
இதனிடையே, மகளிருக்கான ஜெயன்ட் ஸ்லாலோம் போட்டி பலத்த காற்று காரணமாக வியாழக்கிழமைக்கு ஒத்தி வைக்கப்பட்டது.
3-ஆவது நாள் முடிவில் பதக்கப் பட்டியலில் ஜெர்மனி 4 தங்கம், ஒரு வெள்ளி, 2 வெண்கலம் என 7 பதக்கங்களுடன் முதலிடத்தில் உள்ளது. நெதர்லாந்து 3 தங்கம், 2 வெள்ளி, 2 வெண்கலம் என அதே 7 பதக்கங்களுடன் 2-ஆவது இடத்திலும், நார்வே 2 தங்கம், 4 வெள்ளி, 3 வெண்கலம் என 9 பதக்கங்களுடன் 3-ஆவது இடத்திலும் உள்ளன.