ஆசிய தடகள சாம்பியன் போட்டியில் மகளிர் 100 மீ ஓட்டத்தில் இந்திய நட்சத்திரம் டுட்டி சந்த் புதிய தேசிய சாதனை படைத்தார்.
கத்தார் நாட்டின் டோஹாவில் ஆசிய தடகள சாம்பியன் போட்டிகள் நடைபெற்று வருகின்றன. ஞாயிற்றுக்கிழமை பல்வேறு பிரிவுகளில் நடைபெற்ற பந்தயங்களில் இந்திய வீரர், வீராங்கனைகள் பங்கேற்றனர்.
100 மீ. ஹீட்ஸ் பிரிவில் டுட்டி சந்த் 11.28 விநாடிகளில் கடந்து புதிய தேசிய சாதனையை படைத்தார். மேலும் அரையிறுதிச் சுற்றுக்கும் முன்னேறினார்.  தனது முந்தைய சாதனையான 11.29 விநாடிகளை அவர் முறியடித்தார்.
மேலும் ஜின்சன் ஜான்ஸன் 800 மீ, முகமது அனாஸ், ஆரோக்கியராஜிவ் 400 மீ, பிரவீன் சித்திரைவேல் மும்முறை தாண்டுதல், கோமதி மாரிமுத்து மகளிர் 1500 மீ. ஆகியோரும் அடுத்த சுற்றுக்கு முன்னேறினர்.
ஹிமாதாஸ் காயம்: இந்திய இளம் நட்சத்திரமான ஹிமா தாஸ், தசைபிடிப்பு பாதிப்பு காரணமாக 400 மீ. ஹீட்ஸ் பிரிவில் பங்கேற்கவில்லை. எம்.ஆர். பூவம்மா இதில் இறுதிச்சுற்றுக்கு தகுதி பெற்றார்.