புல்வாமா தாக்குதலில் உயிரிழந்தோர் குடும்பத்துக்கு குறைந்தது ரூ.5 கோடி வழங்க வேண்டும் என பிசிசிஐ சிஓஏவுக்கு தற்காலிக தலைவர் சி.கே. கன்னா வலியுறுத்தியுள்ளார்.
 இதுதொடர்பாக அவர் ஞாயிற்றுக்கிழமை எழுதிய கடிதத்தில் கூறியிருப்பதாவது:
 புல்வாமா தாக்குதலில் வீரமரணம் அடைந்த வீரர்களின் குடும்பங்களுக்கு நிவாரண உதவியை வழங்க வேண்டும் அவர்களை இழந்து வாடும் குடும்பத்தினருக்கு ஆழ்ந்த இரங்கல். அதே நேரத்தில் பிசிசிஐ சார்பில் ரூ.5 கோடி நிதியுதவியை வழங்க சிஓஏ நிர்வாகிகள் வினோத் ராய், டயானா எடுல்ஜி நடவடிக்கை எடுக்க வேண்டும். மேலும் பல்வேறு மாநில சங்கங்கள், ஐபிஎல் அணிகளின் உரிமையாளர்களும் தங்களால் இயன்ற நிதியை நன்கொடையாக தர வேண்டும். ஆஸ்திரேலியா-இந்தியா இடையே நடைபெறும் தொடர் முதல் ஆட்டத்தில் 2 நிமிடம் மெளன அஞ்சலி செலுத்த வேண்டும். மேலும் மார்ச் 23-இல் இந்தியன் ப்ரீமியர் லீக் போட்டி தொடக்க விழாவிலும் மெளன அஞ்சலி செலுத்த வேண்டும் எனத் தெரிவித்துள்ளார் கன்னா.