இந்தியாவுக்கு எதிரான முதல் இரு டி20 போட்டிகள்: மே.இ.தீவுகள் அணி அறிவிப்பு

ஆகஸ்ட் மாதம் மேற்கிந்திய தீவுகள் சுற்றுப்பயணம் செய்யும் இந்திய அணி முதலில் 3 போட்டிகள் கொண்ட டி20 தொடரில் பங்கேற்கிறது.

அமெரிக்காவின் ஃப்ளோரிடாவில் உள்ள ப்ரோவார்ட் கௌன்டி மைதானத்தில் ஆகஸ்ட் 3 மற்றும் 4 ஆகிய தேதிகளில் முதல் இரு போட்டிகளும், கயானாவில் ஆகஸ்டு 6-ஆம் தேதி 3-ஆவது போட்டியும் நடைபெறவுள்ளது.

இந்நிலையில், முதல் இரு டி20 போட்டிகளுக்கான மேற்கிந்திய தீவுகள் அணி திங்கள்கிழமை அறிவிக்கப்பட்டது. கெய்ரன் பொல்லார்ட் மற்றும் சுனில் நரேன் ஆகியோர் மே.இ.தீவுகள் அணிக்கு மீண்டும் திரும்பியுள்ளனர்.

காயத்தால் உலகக் கோப்பை அணியில் இருந்து விலகிய ஆல்-ரவுண்டர் ஆண்ட்ரே ரசலும் சேர்க்கப்பட்டுள்ளார். இருப்பினும் உடல்தகுதியில் தேர்வுபெற்றால் மட்டுமே அணியில் தொடர முடியும்.

14 பேர் கொண்ட மே.இ.தீவுகள் அணியின் விவரம் பின்வருமாறு:

கார்லஸ் பிரத்வயிட் (கேப்டன்), ஜான் கேம்பல், இவன் லீவிஸ், ஷிம்ரோன் ஹெத்மேய்ர், நிகோலஸ் பூரான், கெய்ரன் பொல்லார்ட், ரோவ்மேன் பவல், கீமோ பால், சுனில் நரேன், ஷெல்டன் காட்ரல், ஒஷேனோ தாமஸ், அந்தோனி ப்ராம்பெல், ஆண்ட்ரே ரசல், காரி பீய்ரே.