ஆஸ்திரேலியாவுக்கு எதிரான 3-வது டெஸ்ட் ஆட்டத்தின் 2-ம் நாள் ஆட்டநேர முடிவில் பாகிஸ்தான் அணி 1 விக்கெட் இழப்புக்கு 90 ரன்கள் எடுத்து 301 ரன்கள் பின்தங்கியுள்ளது.

பாகிஸ்தான், ஆஸ்திரேலியா இடையிலான மூன்றாவது மற்றும் கடைசி டெஸ்ட் ஆட்டம் லாகூரில் நடைபெற்று வருகிறது. டாஸ் வென்று முதலில் பேட் செய்த ஆஸ்திரேலிய அணி 391 ரன்களுக்கு ஆட்டமிழந்தது.

ஆஸி. பேட்டிங் விவரம்: இங்கே க்ளிக் செய்யவும்..

பாகிஸ்தான் தொடக்க ஆட்டக்காரர்களாக அப்துல்லா ஷஃபிக் மற்றும் இமாம் உல் ஹக் களமிறங்கினர். இமாம் 11 ரன்கள் மட்டுமே எடுத்த நிலையில் ஆஸ்திரேலிய கேப்டன் பேட் கம்மின்ஸ் வேகத்தில் ஆட்டமிழந்தார்.

இதன்பிறகு, ஷஃபிக் மற்றும் அசார் அலி பாட்னர்ஷிப் அமைத்தனர். 2-ம் நாள் ஆட்டம் முடியும் வரை இருவரும் மேற்கொண்டு விக்கெட் விழாமல் பார்த்துக் கொண்டனர்.

ஆட்டநேர முடிவில் பாகிஸ்தான் அணி முதல் இன்னிங்ஸில் 1 விக்கெட் இழப்புக்கு 90 ரன்கள் எடுத்து இன்னும் 301 ரன்கள் பின்தங்கிய நிலையில் உள்ளது.

ஷஃபிக் 45 ரன்களுடனும், அசார் அலி 30 ரன்களுடனும் ஆட்டமிழக்காமல் உள்ளனர்.