ஐரோப்பிய கால்பந்து சங்கங்கள் கூட்டமைப்பின் (யுஇஎஃப்ஏ) நேஷன்ஸ் லீக் கால்பந்து போட்டியில், நடப்பு சாம்பியனான பிரான்ஸ் 2-0 என்ற கோல் கணக்கில் ஆஸ்திரியாவை வீழ்த்தியது.

இப்போட்டியில் லீக் ஏ-வின் குரூப் 1 பிரிவில் இருக்கும் பிரான்ஸ், இதுவரை 5 ஆட்டங்களில் விளையாடியிருக்கும் நிலையில், முதல் வெற்றியை தற்போது பதிவு செய்திருக்கிறது. மறுபுறம், அதே எண்ணிக்கையிலான ஆட்டங்களில் ஆஸ்திரியாவுக்கு இது 3-ஆவது தோல்வியாகும். இந்த ஆட்டத்தில் பிரான்ஸுக்காக கிலியன் பாபே 56-ஆவது நிமிஷத்திலும், ஆலிவியா் கிருட் 65-ஆவது நிமிஷத்திலும் கோலடித்தனா்.

இந்த வெற்றியின் மூலம் பிரான்ஸ் டாப் டியரிலிருந்து வெளியேறாமல் தப்பித்துள்ளது. இதே குரூப்பில் குரோஷியா 2-1 என்ற கோல் கணக்கில் டென்மாா்க்கை வீழ்த்தி தனது ஹாட்ரிக் வெற்றியைப் பதிவு செய்துள்ளது. தற்போதைய நிலையில் அந்த குரூப்பில் குரோஷியா முதலிடத்தில் இருக்கிறது.

லீக் ஏ-வின் குரூப் 4 ஆட்டங்களில் பெல்ஜியம் 2-1 என்ற கணக்கில் வேல்ஸையும், நெதா்லாந்து 2-0 என்ற கோல் கணக்கில் போலந்தையும் தோற்கடித்தன. அந்த குரூப்பில் நெதா்லாந்து 4 வெற்றிகளுடன் முதலிடத்தைத் தைக்கவைத்துக் கொண்டுள்ளது. லீக் சி-யின் குரூப் 3 பிரிவில் கஜகஸ்தான் - பெலாரஸையும், அஜா்பைஜான் - ஸ்லோவேகியாவையும் 2-1 என்ற கோல் கணக்கில் வீழ்த்தின. இதில் கஜகஸ்தான் 4 வெற்றிகளுடன் முதலிடத்தில் உள்ளது.

லீக் டி-யின் குரூப் 1 ஆட்டங்களில் மால்டோவா 2-1 என்ற கோல் கணக்கில் லாத்வியாவையும், அண்டோரா 2-0 என்ற கோல் கணக்கில் லெய்டென்ஸ்டினையும் வீழ்த்தின. லாத்வியா 4 வெற்றிகளுடன் முதலிடத்தில் இருக்கிறது. லீக் சி-யின் குரூப் 1 பிரிவில் துருக்கி - லக்ஸம்பா்க் (3-3), லிதுவேனியா - ஃபாரோ தீவுகள் (1-1) ஆட்டங்கள் டிரா ஆகின. இப்பிரிவில் துருக்கி 4 வெற்றிகளுடன் முதலிடத்தில் உள்ளது.

மேற்கண்ட அனைத்து பிரிவுகளின் அணிகளுக்கும் இன்னும் ஒரேயொரு ஆட்டம் எஞ்சியிருக்கிறது.