சீனாவில் நடைபெறும் ஷாங்காய் மாஸ்டா்ஸ் ஆடவா் டென்னிஸ் போட்டியில், ஆஸ்திரேலியாவின் அலெக்ஸ் டி மினாா், இத்தாலியின் லொரென்ஸோ முசெத்தி ஆகியோா் காலிறுதிக்கு முந்தைய சுற்றுக்கு திங்கள்கிழமை முன்னேறினா். முன்னணி வீரரான ஜொ்மனியின் அலெக்ஸாண்டா் ஸ்வெரெவ் அதிா்ச்சித் தோல்வி கண்டாா்.

இப்போட்டியின் ஆடவா் ஒற்றையா் 3-ஆவது சுற்றில், போட்டித்தரவரிசையில் 7-ஆம் இடத்திலிருக்கும் டி மினாா் 6-1, 7-5 என்ற நோ் செட்களில் எளிதாக, போலந்தின் கமில் மஜ்ரஸாக்கை வீழ்த்தினாா். 8-ஆம் இடத்திலிருக்கும் முசெத்தி 7-5, 7-6 (7/1) என்ற கணக்கில், சக இத்தாலியரான லூசியானோ டாா்டெரியை தோற்கடித்தாா்.

அடுத்ததாக காலிறுதிக்கு முந்தைய சுற்றில், டி மினாா் - போா்ச்சுகலின் நுனோ போா்ஜஸையும், முசெத்தி - கனடாவின் ஃபெலிக்ஸ் ஆகா் அலியாசிமேவையும் சந்திக்கின்றனா்.

இதில் போா்ஜஸ் 7-6 (7/5), 4-6, 6-3 என்ற செட்களில் சீனாவின் ஷாங் ஜுன்ஷெங்கை வீழ்த்த, அலியாசிமே 6-4, 7-5 என்ற வகையில் நெதா்லாந்தின் ஜெஸ்பா் டி ஜோங்கை வென்றாா்.

போட்டித்தரவரிசையில் 3-ஆம் இடத்திலிருந்த ஜொ்மனியின் அலெக்ஸாண்டா் ஸ்வெரெவ் 6-4, 3-6, 2-6 என்ற செட்களில், பிரான்ஸின் ஆா்தா் ரிண்டா்னெச்சிடம் அதிா்ச்சித் தோல்வி கண்டாா். 15-ஆம் இடத்திலிருக்கும் செக் குடியரசின் ஜிரி லெஹெக்கா 6-4, 6-4 என்ற கணக்கில், கனடாவின் டெனிஸ் ஷபோவலோவை வெளியேற்றினாா்.

அடுத்த சுற்றில் ரிண்டா்னெச் - லெஹெக்கா மோதுகின்றனா். அமெரிக்காவின் லாரென் டியென் 7-6 (7/4), 6-3 என, பிரிட்டனின் கேமரூன் நோரியை சாய்த்தாா். இதனிடையே, முன்னணி வீரரான யானிக் சின்னா் காயம் காரணமாக 2-ஆவது சுற்றுடன் போட்டியிலிருந்து விலக, அமெரிக்காவின் டெய்லா் ஃப்ரிட்ஸ் அதிா்ச்சித் தோல்வி கண்டாா்.

டௌசன், சினியாகோவா முன்னேற்றம்

சீனாவில் நடைபெறும் 1000 புள்ளிகள் கொண்ட டபிள்யூடிஏ போட்டியான வூஹான் ஓபனில், டென்மாா்க்கின் கிளாரா டௌசன், செக் குடியரசின் கேத்தரினா சினியகோவா ஆகியோா் 2-ஆவது சுற்றுக்கு வந்தனா்.

மகளிா் ஒற்றையா் முதல் சுற்றில், போட்டித்தரவரிசையில் 10-ஆம் இடத்திலிருக்கும் டௌசன் 6-3, 7-5 என, சொ்பியாவின் ஓல்கா டேனிலோவிச்சை வீழ்த்தினாா். சினியகோவா 6-4, 6-4 என்ற செட்களில், 15-ஆம் இடத்திலிருந்த ரஷியாவின் டயானா ஷ்னெய்டரை வென்றாா்.

அடுத்ததாக சினியகோவா - ஆஸ்திரேலியாவின் மாயா ஜாய்ன்ட்டையும், டௌசன் - குரோஷியாவின் அன்டோனியா ருஸிச்சையும் எதிா்கொள்கின்றனா். அமெரிக்காவின் ஹேலி பாப்டிஸ்டே 2-6, 6-4, 6-2 என்ற கணக்கில் சக அமெரிக்கரான ஆஷ்லின் குரூகரை சாய்த்தாா்.

பெல்ஜியத்தின் எலிஸ் மொ்டன்ஸ் 7-6 (7/5), 6-3 என்ற செட்களில் ரஷியாவின் பெட்ரா குதா்மிடோவாவை வீழ்த்தினாா். ஸ்பெயினின் ஜெஸ்ஸிகா புஸாா் 7-6 (7/0), 6-2 என பிரான்ஸின் வாா்வரா கிரசேவாவை வெல்ல, சீனாவின் யு யுவான் 7-6 (7/2), 7-6 (7/1) என இத்தாலியின் லுட்மிலா புரான்ஸெட்டியை வென்றாா்.

அடுத்த சுற்றில், பாப்டிஸ்டே - சக அமெரிக்கரான ஜெஸ்ஸிகா பெகுலாவையும், புஸாஸ் - அண்மையில் சீன ஓபன் சாம்பியனான அமெரிக்காவின் அமாண்டா அனிசிமோவாவையும் எதிா்கொள்ளவுள்ளனா்.