ஓடும் பேருந்தில் திடீரென மாரடைப்பு ஏற்பட்டதால் முன்னாள் ராணுவ வீரர் புதன்கிழமை இறந்தார்.

 ஈரோடு அருகே சித்தோடு எல்லீஸ்பேட்டை பகுதியை சேர்ந்தவர் மனோகரன் (55). முன்னாள் ராணுவ வீரர். இவரது மனைவி உமா. இவர்களுக்கு 2 மகள்கள் உள்ளனர்.

 புதன்கிழமை காலை தனது சொந்த வேலை காரணமாக மனோகரன், தனது மனைவியுடன் ஈரோட்டுக்கு அரசு பேருந்தில் வந்து கொண்டிருந்தார். வீரப்பன்சத்திரம் பேருந்து நிறுத்தம் அருகே பேருந்து வந்தபோது மனோகரனுக்கு திடீரென வலிப்பு வந்தது.

 இதனால் பேருந்தில் இருந்த சக பயணிகள், நடத்துநருக்கு தகவல் கொடுத்தனர். அதற்கு அந்த பேருந்து, ஈரோடு பேருந்து நிலையத்துக்கு வந்துவிட்டது. அப்போது தனக்கு நெஞ்சுவலி ஏற்பட்டுள்ளதாக மனோகரன் தெரிவித்தார். இதையடுத்து அவரை ஈரோடு அரசுத் தலைமை மருத்துவமனையில் சக பயணிகள், ஓட்டுநர், நடத்துனர் ஆகியோர் சேர்த்தனர்.

 அவரை பரிசோதனை செய்த மருத்துவர்கள், ஏற்கெவே மனோகரன் இறந்துவிட்டதாக தெரிவித்தனர். இதை கேட்ட அவரது மனைவி உமா அழுதுகொண்டே மயங்கிவிழுந்தார். அவரை சக பயணிகள் தேற்றினர். இதனால், அரசுத் தலைமை மருத்துவமனையில் பரபரப்பு ஏற்பட்டது.