சனிப்பெயர்ச்சி:  நளன் தீர்த்தக் குளம் தூர்வாரும் பணி தொடக்கம்

திருநள்ளாறில் நடைபெறவுள்ள சனிப்பெயர்ச்சி விழாவையொட்டி பக்தர்கள் நீராட வசதியாக நளன் குளம் தூர்வாரும் பணி தற்போது தொடங்கியுள்ளது.

திருநள்ளாறு ஸ்ரீ தர்பாரண்யேசுவரர் கோயிலில் சனிப்பெயர்ச்சி விழா வருகிற டிசம்பர் மாதம் 19-ஆம் தேதி நடைபெறவுள்ளது.  

இவ்விழாவிற்கான பல்வேறு முன்னேற்பாடுகளைக்  கோயில் நிர்வாகம் தொடங்கிவிட்டது. முக்கியப் பணியாக பக்தர்கள் நீராடும் நளன் தீர்த்தக் குளத்தின்  மையப் பகுதிக்குள் யாரும் செல்லமுடியாத வகையில்  தடுப்பு வேலி அமைக்கப்பட்டுள்ளது.  குளத்தின்  மையப் பகுதியில் உள்ள த ண்ணீர்  கடந்த 2 நாள்களாக மோட்டார் மூலம் பம்ப் செய்து அகற்றப்பட்டது.

இதுகுறித்து கோயில் நிர்வாகத்  தரப்பில் புதன்கிழமை தெரிவித்தது :  பக்தர்கள் நீராடக்கூடிய  பகுதியில் தற்போது தண்ணீர் உள்ளது.  நான்கு புறங்களில் ஒவ்வொரு புறமாக அடுத்த சில நாள்களில் அகற்றப்பட்டு, புதிதாக மணல் கொட்டப்பட்டு ஆழ்குழாய் மூலம் புதிதாக தண்ணீர் விடப்படும். குளத்தில் தண்ணீர் விடுவதற்கு என குளத்தின் அருகே 2 ஆழ்குழாய் உள்ளன. இதன் மூலம் தண்ணீர் 2 நாள்களில் நிரம்பிவிடும்  என தெரிவித்தனர்.

மேலும் கூறும்போது, கோயில் அருகே உள்ள பிரம்ம தீர்த்தம்,  சரஸ்வதி தீர்த்தம் ஆகியவை சில மாதங்களுக்கு முன்பு தூர்வாரப்பட்டு புதிதாக தண்ணீர் விடப்பட்டுள்ளதால், அந்த தீர்த்தக் குளங்கள் தூர்வாரவேண்டிய அவசியம் தற்போது இல்லை எனவும் தெரிவித்தனர்.