தமிழக அரசின் பேரிடர் மேலாண்மை வாரிய செயல்பாட்டை பாராட்டிய மு.க.ஸ்டாலினுக்கு நன்றி என மீன்வளத்துறை அமைச்சர் ஜெயக்குமார் தெரிவித்துள்ளார். 

இதுகுறித்து அவர் சென்னையில் செய்தியாளர்களுக்கு அளித்த பேட்டியில்,
கஜா புயலை முன்னிட்டு தமிழக மீனவர்களுக்கு முன்கூட்டியே எச்சரிக்கை விடுக்கப்பட்டது. கஜா புயல் கடுமையாக இருந்தாலும் மீனவர்கள் யாருக்கும் எந்த பாதிப்பும் ஏற்படவில்லை. 333 மீனவக் கிராமங்களில் படகுகளுக்கு கடுமையாக சேதம் ஏற்பட்டுள்ளது. 

புயலால் சில நாட்டுப் படகுகள் கடலுக்குள் இழுத்துச்செல்லப்பட்டுள்ளன. மீனவர்களின் உடைமைகளுக்கு ஏற்பட்ட பாதிப்பை ஆய்வுசெய்ய ஆட்சியர்களுக்கு அறிவுறுத்தப்பட்டுள்ளது. மீனவக் கிராமங்களுக்கு அதிகாரிகள் சென்று பாதிப்பை ஆய்வுசெய்து அறிக்கை அளிப்பர். 

தமிழக அரசின் பேரிடர் மேலாண்மை வாரிய செயல்பாட்டை பாராட்டிய மு.க.ஸ்டாலினுக்கு நன்றி. எதிர்க்கட்சிகளே பாராட்டும்வகையில் அரசின் செயல்பாடு அமைந்துள்ளது. இவ்வாறு அவர் கூறினார். 

முன்னதாக புயல் தொடர்பாக தமிழக பேரிடர் மேலாண்மை ஆணையம் மேற்கொண்ட நடவடிக்கைகளுக்கு திமுக தலைவர் மு.க.ஸ்டாலின் இன்று பாராட்டு தெரிவித்திருந்தார் என்பது குறிப்பிடத்தக்கது.