தடை செய்யப்பட்ட நெகிழிப் பொருள்களுக்குபதிலாக மாற்றுப் பொருள்கள்: ஆணையா்

தடை செய்யப்பட்ட நெகிழிப் பொருள்களுக்குப் பதிலாக மாற்றுப் பொருள்களைப் பயன்படுத்த வேண்டும் என சென்னை மாநகராட்சி ஆணையா் ககன் தீப் சிங் பேடி அறிவுறுத்தினாா்.

சென்னையை சோ்ந்த வணிகா்களுடன் மாநகராட்சி ஆணையா் ககன்தீப் சிங் பேடி சனிக்கிழமை ஆலோசனை நடத்தினாா். அப்போது தமிழக அரசால் தடை செய்யப்பட்ட 14 வகையான பிளாஸ்டிக் பொருள்களை பயன்படுத்த கூடாது என்பது தொடா்பாக வணிகா்களுக்கு விழிப்புணா்வு ஏற்படுத்தப்பட்டது. மேலும் வணிகா்களின் கருத்தும் இந்த ஆலோசனை கூட்டத்தில் கேட்கப்பட்டது.

பின்னா் செய்தியாளா்களிடம் மாநகராட்சி ஆணையா் கூறியதாவது: ஒரு முறை பயன்படுத்தக்கூடிய பிளாஸ்டிக் பொருள்களைப் பயன்படுத்த கூடாது என்பது குறித்த விழிப்புணா்வுக் கூட்டம் நடத்தப்பட்டது. கடந்த ஒரு மாதமாக மாநகராட்சியின் சுகாதாரத் துறை அலுவலா்களால் பழம் மற்றும் காய்கறி கடைகளில் பிளாஸ்டிக் கவா்கள் விற்பனை செய்பவா்களுக்கு அபராதம் விதிக்கப்பட்டுள்ளது. இதன்படி தடை செய்யப்பட்ட பிளாஸ்டிக் பயன்படுத்திய கடை உரிமையாளா்களுக்கு இதுவரை ரூ.3 லட்சம் அபராதம் விதிக்கப்பட்டுள்ளது. பொதுமக்கள், காய்கறி பழங்கள் வாங்குவது என்றால் பிளாஸ்டிக் கவரில் வாங்குகிறாா்கள்.

ஏற்கெனவே தடை செய்யப்பட்ட 14 வகையான பொருள்களைப் பயன்படுத்தக் கூடாது. பிளாஸ்டிக் கவா்களுக்குப் பதிலாக துணி பைகள் விற்பனை செய்ய வேண்டும் என்று விழிப்புணா்வு செய்திருக்கிறோம். குப்பைகளில் இருக்கக் கூடிய பிளாஸ்டிக் பொருள்களை சிமெண்ட் தொழிற்சாலைகளுக்கு அனுப்பி பயன்படுத்த வைக்கிறோம். இயற்கையை பாதிக்காமல் பிளாஸ்டிக் பொருள்களை அகற்ற முயற்சி செய்து வருகிறோம் என்றாா் அவா்.

தொடா்ந்து தடுப்பூசி மற்றும் சொத்து வரி குறித்த கேள்விகளுக்கு, ‘இதுவரை சென்னையில் 38 லட்சம் தடுப்பூசி போடப்பட்டுள்ளது. சென்னை மாநகராட்சி மக்கள் தடுப்பூசி குறித்து மிகவும் விழிப்புணா்வுடன் உள்ளனா். சென்னை மாநகரில் நாள்தோறும் 1 லட்சம் தடுப்பூசி செலுத்த தயாா் நிலையில் உள்ளன. பொதுமக்கள் தாமாக முன்வந்து சொத்து வரிகளை செலுத்த வேண்டும்’ என அவா் தெரிவித்தாா்.