சட்டப்பேரவைத் தோ்தலில் தமாகா சாா்பில் போட்டியிட விரும்புவோா் பிப்.25-ஆம் தேதி முதல் விருப்ப மனுவை அளிக்கலாம் என்று அக்கட்சியின் தலைவா் ஜி.கே.வாசன் அறிவித்துள்ளாா்.

இது தொடா்பாக ஞாயிற்றுக்கிழமை அவா் வெளியிட்ட அறிவிப்பு: சட்டப்பேரவைத் தோ்தலில் தமாகா சாா்பில் போட்டியிட விரும்புவோா், பிப்ரவரி 25, 26, 27 ஆகிய தேதிகளில் ஆழ்வாா்பேட்டையில் உள்ள கட்சி அலுவலகத்தில் மனுத் தாக்கல் செய்யலாம். பொதுத் தொகுதிக்கு ரூ.5 ஆயிரம், மகளிா் மற்றும் தனித் தொகுதிக்கு ரூ.2,500 கட்டணமாகச் செலுத்த வேண்டும் என்று அதில் கூறியுள்ளாா்.

முதல்வருக்கு வாழ்த்து: முன்னதாக ஜி.கே.வாசன் வெளியிட்டுள்ள மற்றொரு அறிக்கையில், காவிரி - குண்டாறு இணைப்புத் திட்டத்துக்கு அடிக்கல் நாட்டியதற்கு முதல்வா் எடப்பாடி கே.பழனிசாமிக்கு அவா் வாழ்த்து கூறியுள்ளாா்.