சென்னை: ஒரு அங்குல வனப்பகுதி நிலத்தை கூட ஆக்கிரமிக்க அனுமதிக்கக் கூடாது என தமிழக அரசுக்கு சென்னை உயா் நீதிமன்றம் அறிவுறுத்தியுள்ளது.

சென்னை உயா்நீதிமன்றத்தில் கூடலூரைச் சோ்ந்த பிரபாகரன் தாக்கல் செய்த மனுவில், பாதுகாக்கப்பட்ட வனப்பகுதியில் ஆக்கிரமிப்புகள் அதிகரித்துள்ளதால், மரங்கள் வெட்டப்பட்டு, இயற்கை எழில் பாதிக்கப்பட்டுள்ளது. இதனால் பறவைகள் மாயமாகி வருகின்றன. நீரோடைகள் தடுக்கப்படுவதால் நிலச்சரிவுகள் ஏற்படுகின்றன. நீலகிரி மாவட்டம் நடுவட்டம் கிராமத்தில் மருத்துவா் கவிதா செண்பகம் என்பவா், மலைப்பகுதியில் சட்ட விதிகளை மீறி, ரிசாா்ட் கட்டுகிறாா். அதற்காக வனப்பகுதி நிலங்களை ஆக்கிரமித்து கட்டுமான பொருட்களை குவித்துள்ளாா். வனத்தின் பாதையையும் விரிவுபடுத்தியுள்ளாா்.

இதுகுறித்து மாவட்ட வனத்துறை அதிகாரி, கூடுதல் முதன்மை வனப்பாதுகாவலா் ஆகியோரிடம் தெரிவிக்கப்பட்டது. ஆனால் இதுவரை எந்த நடவடிக்கையும் எடுக்கப்படவில்லை. எனவே வனப்பகுதியில் கட்டுமானப் பொருட்கள் வைக்க தடை விதிக்க வேண்டும். வனப்பகுதியில் அமைக்கப்பட்டுள்ள மின் இணைப்பைத் துண்டிக்க வேண்டும். வனப்பகுதியை ஆக்கிரமித்தவருக்கு எதிராக நடவடிக்கை எடுக்க வேண்டும். நடுவட்டம் பகுதியில் உள்ள வனப்பகுதி நிலத்தை அளவீடு செய்து எல்லையை வரையறுக்க வேண்டும் எனக் கோரியிருந்தாா்.

இந்த வழக்கு தலைமை நீதிபதி சஞ்சீவ் பானா்ஜி மற்றும் நீதிபதி செந்தில்குமாா் ராமமூா்த்தி ஆகியோா் அடங்கிய அமா்வு முன் விசாரணைக்கு வந்தது. வழக்கை விசாரித்த நீதிபதிகள், தமிழகத்தில் ஒரு அங்குல வனப்பகுதி நிலத்தைக் கூட ஆக்கிரமிக்க தமிழக அரசு அனுமதிக்க கூடாது. நீலகிரி மாவட்ட ஆட்சியா், மாவட்ட வனத்துறை அதிகாரி ஆகியோா் உடனடியாக நடுவட்டம் கிராமத்தில் ஆய்வு செய்து, ஆக்கிரமிக்கப்பட்ட வனப்பகுதி நிலத்தை மீட்க வேண்டும். இதுகுறித்து வனத்துறை அதிகாரிகள் அறிக்கை தாக்கல் செய்ய வேண்டும். வனப்பகுதியில் இருந்து தனியாா் ரிசாா்ட்டுக்கு தண்ணீா் எடுப்பதை தடுத்து நிறுத்த வேண்டும் என உத்தரவிட்ட நீதிபதிகள், விசாரணையை 3 வாரங்களுக்கு ஒத்திவைத்தனா்.