ராமேசுவரம்: தனுஷ்கோடி கடற்கரையில் 13 இடங்களில் இருந்து 1533 ஆமை முட்டைகளை வனத்துறையினா் வியாழக்கிழமை கண்டெடுத்து குஞ்சு பொரிப்பகத்தில் பாதுகாப்புடன் வைத்தனா்.

ராமநாதபுரம் மாவட்டம், மன்னாா் வளைகுடா கடற்கரை பகுதிகளில் ஆண்டு தோறும் ஜனவரி மாதம் முதல் ஆமைகள் கரைக்கு வந்து முட்டையிட்டுச் செல்லும். அவற்றை வனத்துறையினா் சேகரித்து குஞ்சு பொரிப்பகத்தில் பாதுகாத்துவைத்து, குஞ்சு பொறித்தவுடன் மீண்டும் கடலில் விட்டு வருவது வழக்கம்.

இந்த நிலையில் கடந்த ஜனவரி 11-ஆம் தேதி ஆமைகள் முட்டையிடும் காலம் தொடங்கியது.  அதைத் தொடா்ந்து வனத்தறையினா் முட்டைகளை சேகரித்து வருகின்றனா். புதன்கிழமை காலையில் தனுஷ்கோடி கடற்கரைப் பகுதியில் புதன்கிழமை காலையில் 450 ஆமை முட்டைகளை வனத்துறையினா்  சேகரித்தனர்.

இதனைத் தொடர்ந்து இன்று வியாழக்கிழமை தனுஷ்கோடி, அரிச்சல்முனை, முகுந்தராயர் சத்திரம், பாரடி உள்ளிட்ட 13 இடங்களில் 1533 ஆமை முட்டைகளை வனத்துறையினர் சேகரித்து குஞ்சு பொரிப்பகத்தில் பாதுகாப்புடன் வைத்தனர்.

தற்போது வரையில் 9747 ஆமை முட்டைகள் குஞ்சு பொரிப்பகத்தில் பாதுகாப்புடன் உள்ளதாக வனத்துறை அலுவலர் வெங்கடேஷ் தெரிவித்தார்.