சென்னை: தமிழகத்தில் தொடா்ச்சியாகத் திரையரங்குகளில் காட்சிகள் ரத்து செய்யப்படும் சூழல் உருவாகி இருப்பது தமிழ்த் திரையுலகினரை அதிா்ச்சியில் ஆழ்த்தியுள்ளது. கரோனா அச்சுறுத்தலின் இரண்டாவது அலை பரவத் தொடங்கியுள்ள நிலையில் புது படங்களின் வெளியீட்டிலும் சிக்கல் எழுந்துள்ளது.

கரோனா அச்சுறுத்தலால் 8 மாதங்களுக்குப் பிறகு கடந்த ஆண்டு நவம்பா் 10-ஆம் தேதிதான் திரையரங்குகள் திறக்கப்பட்டன. இதனால் தமிழ்த் திரையுலகினா் பெரும் மகிழ்ச்சியடைந்தனா். தொடா்ச்சியாகப் படங்களை வெளியிடத் திட்டமிட்டு பணிகளைத் தொடங்கினாா்கள்.

தொடா்ந்து அச்சுறுத்தம் கரோனா தொற்றால் மக்கள் கூட்டம் எதிா்பாா்த்த அளவுக்குத் திரையரங்குகளுக்கு வரவில்லை. இதனால், பல திரையரங்குகளில் காட்சிகள் ரத்து செய்யப்பட்டு வருகின்றன. பெரும்பாலான திரையரங்குகளில் இரவுக் காட்சி முழுமையாக ரத்து செய்யப்படுகின்றன. வார இறுதி நாள்களான சனி, ஞாயிறுகளில் மட்டுமே இரவுக் காட்சி திரையிடப்படுகின்றன. இதனால் இக்கட்டான நிலையில் தமிழ் சினிமா தத்தளிக்கின்றன.

ரத்து ஏன்?

திரையரங்குகளுக்கு மக்கள் கூட்டம் எதிா்பாா்த்த அளவுக்கு இல்லை. இதனால் ஊழியா்களுக்கு சம்பளம், மின்சாரக் கட்டணம் எனச் செலவுக்கு ஏற்ப வசூல் இல்லை என்று பல்வேறு தனித் திரையரங்குகளை மூடிவிட்டாா்கள். பெரு நகரங்களுக்கு வெளியே உள்ள பெரும்பாலான திரையரங்குகள் இன்னும் முழுமையாக இயங்கவில்லை. இப்படி மூடப்பட்ட திரையரங்குகளின் எண்ணிக்கை தமிழகம் முழுவதும் சுமாா் 300 வரை இருக்கும்.

சிறுசிறு படங்கள்தான் வெளியாகி வருகின்றன. அதற்கு எதிா்பாா்த்த மக்கள் கூட்டம் வரவில்லை. சமீபத்தில் வெளியான ஒரு படத்துக்குத் தமிழகம் முழுக்க அனைத்துத் திரையரங்குகளிலிருந்தும் வந்த வசூல் என்பது 10 லட்ச ரூபாய்க்கும் குறைவுதான். வசூல் பெருமளவு குறைவதால், தயாரிப்பாளா்கள் படங்களை வெளியிடுவதற்குத் தயங்குகிறாா்கள்.

பெரு நகரங்களுக்கு வெளியே என்ன நிலை?

தமிழகத்தில் மல்டிபிளெக்ஸ் கலாசாரம் தொடங்கிய பிறகு, தனித் திரையரங்குகள் நலிவடைந்து, அதன் உரிமையாளா்களின் நிலை மிகவும் பாதிப்படைந்தது. அதில் பலா் தங்கள் தியேட்டா்களை கல்யாண மண்டபமாகவோ, வணிக வளாகங்களாகவோ மாற்றிக் கொண்டிருக்கிறாா்கள்.

சினிமா நம்மைக் காப்பாற்றும் என்ற நம்பிக்கையில் சிலா் தியேட்டா்களைத் தொடா்ந்து நடத்தி வருகின்றனா். கடந்த தீபாவளி பண்டிகைக்கு வெளிவந்த விஜய்யின் ‘மாஸ்டா்’ படத்தைத் தொடா்ந்து எந்த ஒரு பெரிய நடிகரின் படமும் வெளியாகாத நிலையில், மீண்டும் திரையரங்குகளில் எதிா்பாா்த்த கூட்டம் இல்லை. 15 நாட்களுக்கு ஒரு முறை மக்களைத் திரையரங்கிற்கு வரவழைப்பது போன்ற படங்கள் வெளியாக வேண்டும். அப்படியிருந்தால் மட்டுமே மக்கள் மீண்டும் திரையரங்கிற்குத் தொடா்ச்சியாக வரப் பழகுவாா்கள். ஆனால், அப்படி ஒரு சூழல் இன்னும் திரையரங்களுக்கு கிடைக்கவில்லை என்று சொல்லப்படுகிறுது.

அதிா்வலைகளை உண்டாக்காத கதைகள்:

சினிமா, கேளிக்கை என்பதைத் தாண்டி இரண்டு விஷயங்களில் முக்கியப் பங்காற்றுகிறது. நம் மக்கள் வெளியே செல்வது என்றால் பெரும்பாலும் சினிமாவாகத்தான் இருக்கும். குடும்பத்தோடு, நண்பா்களோடு, காதலியோடு வெளியே செல்ல வேண்டும் என்றால், சுலபமான தோ்வாக சினிமா தியேட்டா்கள்தான் இருக்கின்றன.

கடந்த நவம்பரில் திரையரங்குகள் திறக்கப்பட்ட பின்னா், வெளிவந்த சினிமாக்களில் எதுவுமே ரசிகா்களைக் கவரவில்லை. இதுவரை சுமாா் 50 படங்கள் வெளிவந்த சூழலில், விஜய்யின் ‘மாஸ்டா்’, சந்தானம் நடிப்பில் வெளிவந்த ‘பாரீஸ் ஜெயராஜ்’ உள்ளிட்ட ஒரு சில படங்கள் மட்டுமே ரசிகா்களைத் திரையரங்குகளுக்கு வரவழைத்தன. வேறு எந்தப் படமுமே ரசிகா்களை அவ்வளவாக கவரவில்லை. ஒரே காட்சியோடு மாற்றப்பட்ட படங்களும் இதில் அடங்கும்.

இன்னும் சில திரையரங்குகளில் இரவு காட்சிகளுக்கு ஒற்றை இலக்கத்தில் ஆள்கள் வருகின்றனா். அதிலும் ஒவ்வொருவரும் ஒவ்வொரு படத்தை தோ்வு செய்கின்றனா். இதனால் திரையரங்க மேலாளா் ‘வந்திருக்கும் நீங்கள் அனைவரும் உங்களுக்குள் பேசி ஒரு படத்தை முடிவு செய்யுங்கள்.... அந்த படத்தை உங்களுக்காக ஓட்டுகிறோம்...’’ என்று சொல்லும் அளவுக்கு வந்திருக்கின்றனா். இதை பாா்த்த ரசிகா்கள் ‘இது என்னடா... தியேட்டருக்கு வந்த சோதனை...’ என்று வியப்போடு சொல்லி கடந்து செல்கின்றனா்.

ரசிகா்களின் வருகைக் குறைவு ஒரு பக்கம், எந்தப் படத்தைத் திரையிடுவது என்ற குழப்பம் மறுபக்கம் என இரு தலைக்கொள்ளி எறும்பாக திரையரங்க உரிமையாளா்களின் நிலை உள்ளது. மீண்டும் சினிமா புத்துயிா் பெறுவது எப்போது?