2,650 ஆஷா பணியாளா்களுக்கு அடையாள அட்டை: அமைச்சா் மா.சுப்பிரமணியன் உறுதி

தமிழகம் முழுவதும் பணியாற்றும் 2,650 ஆஷா பணியாளா்களுக்கு அடையாள அட்டை வழங்கப்படும் என மக்கள் நல்வாழ்வுத் துறைஅமைச்சா் மா.சுப்பிரமணியன் தெரிவித்தாா்.

ஆஷா பணியாளா்களை பணி நிரந்தரம் செய்ய வேண்டும். மாதம் ரூ.18 ஆயிரம் ஊதியம் வழங்க வேண்டும். கரோனா கால நிவாரணமாக ரூ.25 ஆயிரம் வழங்க வேண்டும். அடையாள அட்டை வழங்க வேண்டும். மக்களைத் தேடி மருத்துவம் திட்டத்தில் ஆஷா பணியாளா்களை சோ்க்கை வேண்டும் என்பது உள்ளிட்ட பல்வேறு கோரிக்கைகளை வலியுறுத்தி தமிழ்நாடு ஆஷா பணியாளா் சங்கத்தின் மாநில கோரிக்கை மாநாடு சென்னையில் சனிக்கிழமை நடைபெற்றது.

மாநாட்டில் சங்கத்தின் நிா்வாகிகள் கோரிக்கை மனுவை அமைச்சா் மா.சுப்பிரமணியத்திடம் வழங்கினா். இதையடுத்து அமைச்சா் மா.சுப்பிரமணியன் செய்தியாளா்களிடம் கூறியது: தமிழகம் முழுவதும் 2,650 ஆஷா பணியாளா்கள் பணியாற்றி வருகின்றனா். அவா்களுக்கு உடனடியாக அடையாள அட்டை வழங்க நடவடிக்கை எடுக்கப்படும். நகா்ப்புறங்களில் பேருந்தில் மகளிா் இலவசமாக பயணம் செய்யும் நிலை உள்ளது. கிராமப்புறங்களில் ஆஷா பணியாளா்கள் பேருந்தில் இலவசமாக பயணம் செய்ய நடவடிக்கை எடுக்கப்படும்.

தேசிய சுகாதார திட்டத்தின்படி 10 ஆண்டுகளுக்கு முன்பு பகுதிநேர பணியாளா்களாக ஆஷா பணியாளா்கள் நியமிக்கப்பட்டனா். இவா்களுக்கு ஊதியம் கிடையாது. ஊக்கத்தொகை மட்டுமே வழங்கப்படுகிறது. ஆஷா பணியாளா்களுக்கு மாதம் தோறும் ரூ.5 ஆயிரம் வழங்கப்படுகிறது. காசநோய், கா்ப்பிணிகளை கண்டறிந்து பதிவு செய்பவா்களுக்கு ரூ.1,000 கூடுதலாக வழங்க நடவடிக்கை எடுக்கப்படும். 42 வயதுக்குட்பட்ட பிளஸ் 2 முடித்தவா்களுக்கு இரண்டு ஆண்டு பயிற்சி கொடுத்து ஆண்டுக்கு 60 பேரை நிரந்தர செவிலியராக நியமிக்க நடவடிக்கை எடுக்கப்படும்.

4,900 செவிலியா்கள் நியமனம்: தனியாா் நிறுவனங்கள் மூலம் மக்கள் நல்வாழ்வுத் துறையில் பணியாளா்கள் நியமிக்கப்படுவதில்லை. மாவட்ட ஆட்சித் தலைவா்கள் மூலமாக நேரடியாக பணியாளா்கள் நியமிக்கப்படுகின்றனா். ‘மக்களைத் தேடி மருத்துவம்’ திட்டத்துக்கும் 4,900 செவிலியா்கள் பணி நியமனம் செய்யப்படவுள்ளனா். இதுவும் மாவட்ட ஆட்சித் தலைவா்கள் மூலமாகவே நியமிக்கப்படுகின்றனா். மழைக்கால சிறப்பு மருத்துவ முகாம்கள் விரைவில் நடத்தப்படவுள்ளது என்றாா் அவா்.