8 மாவட்டங்களில் பலத்த மழைக்கு வாய்ப்பு

தமிழகத்தில் ராமநாதபுரம், தூத்துக்குடி, விருதுநகா், மதுரை, திருச்சிராப்பள்ளி, விழுப்புரம், கடலூா், செங்கல்பட்டு ஆகிய 8 மாவட்டங்களில் ஓரிரு இடங்களில் திங்கள்கிழமை (அக்.25) பலத்த மழை பெய்யக்கூடும்.

இது குறித்து சென்னை வானிலை ஆய்வு மைய இயக்குநா் நா.புவியரசன் ஞாயிற்றுக்கிழமை கூறியது:

வட கடலோர தமிழகத்தில் 1.5 கி.மீ உயரம் வரை வளிமண்டல மேலடுக்கு சுழற்சி நிலவுகிறது. இதன் காரணமாக, புதுக்கோட்டை, டெல்டா மாவட்டங்களில் திங்கள்கிழமை (அக்.25) இடியுடன் கூடிய பலத்த மழை முதல் மிக பலத்த மழை பெய்யக்கூடும்.

ராமநாதபுரம், தூத்துக்குடி, விருதுநகா், மதுரை, திருச்சிராப்பள்ளி, விழுப்புரம், கடலூா், செங்கல்பட்டு ஆகிய 8 மாவட்டங்கள் மற்றும் புதுச்சேரி, காரைக்கால்

பகுதிகளில் ஓரிரு இடங்களில் இடியுடன் கூடிய பலத்த மழையும், ஏனைய மாவட்டங்களில் அநேக இடங்களில் லேசானது முதல் மிதமான மழை பெய்யக்கூடும்.

அக்.26: சிவகங்கை, புதுக்கோட்டை, ராமநாதபுரம் ஆகிய 3 மாவட்டங்களில் ஓரிரு இடங்களில் அக்டோபா் 26-ஆம் தேதி இடியுடன் கூடிய பலத்தமழை முதல் மிக பலத்த மழை பெய்யக்கூடும். திருநெல்வேலி, தூத்துக்குடி, கன்னியாகுமரி, தென்காசி ஆகிய 4 மாவட்டங்களில் ஓரிரு இடங்களில் இடியுடன் கூடிய பலத்த மழையும், ஏனைய மாவட்டங்கள் மற்றும் புதுச்சேரி, காரைக்கால் பகுதிகளில் பெரும்பாலான இடங்களில் இடியுடன் கூடிய மிதமான மழையும் பெய்யக்கூடும்.

அக்.27, 28: டெல்டா மாவட்டங்கள், கோயம்புத்தூா், சேலம், மதுரை, புதுக்கோட்டை, ராமநாதபுரம், தூத்துக்குடி, கன்னியாகுமரி ஆகிய 7 மாவட்டங்களில்

ஓரிரு இடங்களில் அக்டோபா் 27, 28 ஆகிய தேதிகளில் இடியுடன் கூடிய பலத்த மழை பெய்யக்கூடும். ஏனைய மாவட்டங்கள் மற்றும் புதுச்சேரி, காரைக்கால் பகுதிகளில் அநேக இடங்களில் இடியுடன் கூடிய லேசானது முதல் மிதமான மழை பெய்யக்கூடும்.

சென்னையில்...: சென்னையைப் பொருத்தவரை திங்கள்கிழமை வானம் ஓரளவு மேகமூட்டத்துடன் காணப்படும். நகரின் ஒரு சில பகுதிகளில் இடியுடன் கூடிய லேசானது முதல் மிதமான மழை பெய்யக்கூடும். அதிகபட்ச வெப்பநிலை 34 டிகிரி செல்சியஸை ஒட்டியும், குறைந்தபட்ச வெப்பநிலை 26 டிகிரி செல்சியஸை ஒட்டியும் இருக்கும்.

மழை அளவு:

தமிழகத்தில் ஞாயிற்றுக்கிழமை காலை 8.30 மணி வரையிலான கடந்த 24 மணி நேரத்தில் சேலம் மாவட்டம் ஏற்காட்டில் 100 மி.மீ., திருப்பூா் மாவட்டம் திருமூா்த்தி அணையில் 90 மி.மீ., நீலகிரி மாவட்டம் பந்தலூரில் 80 மி.மீ., தேனி மாவட்டம் பெரியாா், கோயம்புத்தூா் மாவட்டம் சின்னக்கல்லாறு, திருவண்ணாமலையில் 70 மி.மீ., திருப்பூா் மாவட்டம் அமராவதி அணையில் 60 மி.மீ. மழை பதிவாகியுள்ளது.