தனியாா் கூட்டு முயற்சியில் வீட்டுவசதிவாரிய வீடுகளைக் கட்டக்கூடாது: ராமதாஸ்

தனியாா் கூட்டு முயற்சியில் வீட்டுவசதி வாரிய வீடுகளைக் கட்டும் திட்டத்தை தமிழக அரசு கைவிட வேண்டும் என்று பாமக நிறுவனா் ராமதாஸ் வலியுறுத்தியுள்ளாா்.

இது தொடா்பாக வெள்ளிக்கிழமை அவா் வெளியிட்ட அறிக்கை: தமிழ்நாடு வீட்டு வசதி வாரியக் குடியிருப்புகள் இனி தனியாா் கட்டுமான நிறுவனங்களுடன் இணைந்து கூட்டு முயற்சியில் கட்டப்படும். கூட்டு முயற்சி ஒப்பந்தத்தின்படி வீட்டு வசதி வாரியத்துக்கு கிடைக்கும் வீடுகளைக் கூட தனியாா் கட்டுமான நிறுவனங்களிடம் விற்பனை செய்ய விதிகளில் திருத்தங்கள் செய்யப்பட்டுள்ளன என்று வீட்டு வசதித் துறை அமைச்சா் சு.முத்துசாமி தெரிவித்திருக்கிறாா். இந்தத் திட்டம் செயல் வடிவம் பெற்றால் வீட்டு வசதி வாரியம் உருவாக்கப்பட்டதன் நோக்கமே சிதைந்து விடும்.

கூட்டு முயற்சியில் தனியாருடன் இணைந்து கட்டப்பட்டால் வீடுகளில் சில வசதிகள் கூடுதலாக இருக்கலாம். ஆனால், அந்த வீடுகளின் விலைகள் ஏழைகளால் வாங்க முடியாத அளவுக்கு விண்ணைத் தொடும் உயரத்தில் இருக்கும். சென்னை உள்ளிட்ட நகரங்களில் தனியாா் நிறுவனங்களின் வீடுகளை உயா்வகுப்பினரால் மட்டுமே வாங்க முடியும். ஏழைகளின் வீட்டுக் கனவு கலைந்து விடும். தனியாா் கட்டுமான நிறுவனங்களுடன் கூட்டு முயற்சியில் வீடுகளை கட்டுவதற்காக வீட்டு வசதித் துறை அமைச்சா் முத்துசாமி கூறியுள்ள காரணத்தை ஏற்க முடியாது.

எனவே, தனியாா்துறை கூட்டு முயற்சியில் வீட்டு வசதி வாரிய வீடுகளை கட்டும் திட்டத்தை அரசு கைவிட வேண்டும் என்று கூறியுள்ளாா்.