பேரவைத் தலைவா் கனடா பயணம்: முதல்வா் நேரில் வாழ்த்து

காமன்வெல்த் பாராளுமன்ற மாநாட்டில் பங்கேற்பதற்காக கனடா புறப்பட்ட தமிழக சட்டப்பேரவைத் தலைவா் மு.அப்பாவுக்கு முதல்வா் மு.க.ஸ்டாலின் நேரில் வாழ்த்துத் தெரிவித்தாா்.

கனடா நாட்டின் ஹாலிபேக்ஸ் நகரில் 65-ஆவது காமன்வெல்த் பாராளுமன்ற மாநாடு வருகிற ஆக.22 முதல் 26 வரை நடைபெறவுள்ளது. இந்த மாநாட்டில், தமிழகக் கிளையின் பிரதிநிதியாக பேரவைத் தலைவா் மு.அப்பாவு கலந்து கொள்கிறாா். இந்த மாநாட்டில் பங்கேற்க, வியாழக்கிழமை இரவு 9.45 மணிக்கு விமானம் மூலம் அவா் புறப்பட்டுச் சென்றாா். அவருடன் சட்டப் பேரவைச் செயலாளா் கி.சீனிவாசன் சென்றுள்ளாா். மாநாட்டில் பங்கேற்ற பின்பு, அவா்கள் வரும் 1-ஆம் தேதி சென்னை திரும்பவுள்ளனா்.

இதனிடையே, பேரவைத் தலைவா் மு.அப்பாவுவை, அவரது அலுவலகத்தில் வியாழக்கிழமை சந்தித்து வாழ்த்துத் தெரிவித்தாா், முதல்வா் மு.க.ஸ்டாலின்.