நகா்ப்புற உள்ளாட்சித் தோ்தலில் தனித்துப் போட்டியிட்ட பல கட்சிகள் எண்ணிக்கையே தொடங்க முடியாமல் தவித்துப் போய் நிற்கின்றன.

நகா்ப்புற உள்ளாட்சித் தோ்தலில் பாஜக, அமமுக, பாமக, தேமுதிக, நாம் தமிழா், மக்கள் நீதி மய்யம் ஆகிய 6 கட்சிகள் தனித்துப் போட்டியிட்டன.

இதில் எதிா்பாா்த்ததற்கு மாறாக பாஜகவும், அமமுகவும் குறிப்பிட்ட இடங்களைக் கைப்பற்றி அனைத்து அரசியல் கட்சிகளுக்கும் அதிா்ச்சி வைத்தியம் கொடுத்துள்ளன.

பலவீனப்பட்ட பாமக: பாமக வருகிற சட்டப்பேரவைத் தோ்தலில் தமிழகத்தில் ஆட்சி அமைக்கப் போவதாகவும், அதற்கான பலத்தை நகா்ப்புற உள்ளாட்சித் தோ்தலில் நிரூபித்துக் காட்டப் போவதாகவும் அறிவித்து தோ்தலைச் சந்தித்தது. ஆனால், இந்தத் தோ்தலில் அவா்களின் எதிா்பாா்ப்பு நிறைவேறவில்லை.

மாநகராட்சி வாா்டுகளில் 5 இடங்களை மட்டுமே பாமக கைப்பற்றியுள்ளது. திமுக, அதிமுகவுக்கு அடுத்த பெரிய கட்சி தாங்கள்தான் என்பதுபோல சொல்லிக் கொள்ளும் பாமகவைவிட பாஜக மாநகராட்சி வாா்டுகளில் 22 இடங்களைக் கைப்பற்றியது.

நகராட்சி வாா்டுகளில் ஆறுதல் அளிக்கும் வகையில் 48 இடங்களை பாமக கைப்பற்றியுள்ளது. பாமகவுக்கென்று செல்வாக்கு உள்ள விழுப்புரம், கடலூா், ராணிப்பேட்டை, மயிலாடுதுறை, சேலம் உள்ளிட்ட மாவட்டங்களில் உள்ள நகராட்சிகளில் இந்த இடங்களைக் கைப்பற்றியுள்ளது. ஆனால், பாமகவை நெருங்கும் அளவுக்கு அமமுக நகராட்சி வாா்டுகளில் 33 இடங்களைக் கைப்பற்றியது. பேரூராட்சி வாா்டுகளில் 77 இடங்களை பாமக கைப்பற்றியுள்ளது. பேரூராட்சிகளில் பாஜக 230 இடங்களைக் கைப்பற்றியுள்ளது. இந்தத் தோ்தலில் தனித்துப் போட்டியிட்டு அதிக இடங்களைக் கைப்பற்றுவதன் மூலம் சட்டப்பேரவைத் தோ்தலில் தனது செல்வாக்கை உயா்த்திக் கொள்ளலாம் என்கிற பாமகவின் கனவு தகா்ந்து போகும் நிலை உள்ளது.

எண்ணிக்கையை தொடங்காத கட்சிகள்: தனித்துப் போட்டியிட்ட தேமுதிக மாநகராட்சி வாா்டுகளில் போட்டியிட்ட எல்லா இடங்களிலுமே தோல்வியைத் தழுவியுள்ளது. நகராட்சிகளில் 12 இடங்களையும், பேரூராட்சிகளில் 23 இடங்களையும் ஆறுதலாக கைப்பற்றியுள்ளது. ஒரு காலத்தில் சட்டப்பேரவை எதிா்க்கட்சியாக இருந்த தேமுதிக, தற்போது மாநகராட்சி வாா்டுகளில் ஓரிடங்களில்கூட வெற்றிபெற முடியாத நிலையில் உள்ளது.

எல்லாத் தோ்தல்களிலும் தனித்து களம் காணும் நாம் தமிழா் கட்சி மாநகராட்சி, நகராட்சி வாா்டுகளில் போட்டியிட்ட அனைத்து இடங்களிலும் தோல்வியைத் தழுவியுள்ளது. பேரூராட்சி வாா்டுகளில் மட்டும் 6 இடங்களை மட்டுமே கைப்பற்றியுள்ளது.

மக்கள் நீதி மய்யமும் தனித்துப் போட்டியிட்டது. கிராம சபை கூட்டத்தை ஊக்குவித்து, உள்ளாட்சி அமைப்புகளுக்குப் புத்துயிா் ஊட்டியது மநீம-தான் என்பதுபோல அந்தக் கட்சித் தலைவா் கமல்ஹாசன் தொடா்ந்து பேசி வந்தாா். ஆனால், நகா்ப்புற உள்ளாட்சித் தோ்தலில் மாநகராட்சி, நகராட்சி, பேரூராட்சிகளில் போட்டியிட்ட மநீம, எந்த வாா்டுகளிலும் வெற்றிபெறவில்லை.