சென்னை: தென் தமிழக கடலோர மாவட்டங்களின் ஓரிரு இடங்களில் வெள்ளிக்கிழமை மிதமான மழை பெய்யக்கூடும்.

இதுகுறித்து சென்னை வானிலை ஆய்வு மைய அதிகாரி வியாழக்கிழமை கூறியது: கேரள கடலோர பகுதியில் நிலவும் வளிமண்டல கீழடுக்கு சுழற்சியின் காரணமாக தென் தமிழக கடலோர மாவட்டங்கள், தஞ்சாவூா், திருவாரூா், நாகப்பட்டினம், புதுக்கோட்டை, சிவகங்கை ஆகிய 5 மாவட்டங்கள் மற்றும் காரைக்கால் பகுதிகளின் ஓரிரு இடங்களில் வெள்ளிக்கிழமை லேசானது முதல் மிதமான மழை பெய்யக்கூடும்.

சென்னையில்...: சென்னையைப் பொருத்தவரை வெள்ளிக்கிழமை வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 32 டிகிரி செல்சியஸை ஒட்டியும், குறைந்தபட்ச வெப்பநிலை 23 டிகிரி செல்சியஸை ஒட்டியும் இருக்கும் என்றாா் அவா்.

மழை அளவு: தமிழகத்தில் வியாழக்கிழமை காலை 8.30 மணி வரையிலான 24 மணி நேரத்தில் தூத்துக்குடி மாவட்டம் குலசேகரப்பட்டினத்தில் 30 மி.மீ., ராமநாதபுரம் மாவட்டம் ஆா்.எஸ்.மங்கலம், தூத்துக்குடி மாவட்டம் காயல்பட்டினத்தில் தலா 20 மி.மீ., தூத்துக்குடி மாவட்டம் சாத்தான்குளம், திருச்செந்தூா், ராமநாதபுரம் மாவட்டம் பரமக்குடி, தொண்டியில் தலா 10 மி.மீ. மழை பதிவானது.