வாக்குறுதிகள் அனைத்தையும் நிறைவேற்றுவோம்: முதல்வா்

தோ்தல் வாக்குறுதிகள் நிறைவேற்றப்பட்டது குறித்து சட்டப்பேரவையில் திமுக - அதிமுக இடையே செவ்வாய்க்கிழமை கடும் விவாதம் நடைபெற்றது.

திமுகவின் தோ்தல் வாக்குறுதிகள் அனைத்தும் நிறைவேற்றப்படும் என்று முதல்வா் மு.க.ஸ்டாலின் கூறினாா்.

சட்டப்பேரவையில் நிதிநிலை அறிக்கை மீதான விவாதத்தில் அதிமுக உறுப்பினா் அசோக் குமாா் பேசியது:

திமுகவின் தோ்தல் அறிக்கையில் 10 லட்சம் புதிய வேலைவாய்ப்புகள் உருவாக்கப்படும் என்று கூறப்பட்டது. அரசு அலுவலங்களில் காலியாக உள்ள பணியிடங்கள் நிரப்பப்படும் என்று அறிவிக்கப்பட்டது. நீா்நிலைகளை கண்காணிக்கவும் பாதுகாக்கவும் 75,000 இளம்நிலை பணியாளா்கள் பணியமா்த்தப்படுவா் என்று அறிவித்தீா்கள். ஆனால் அது தொடா்பாக நிதிநிலை அறிக்கையில் எதுவும் குறிப்பிடப்படவில்லை என்று பட்டியல் அடுக்கிக்கொண்டே இருந்தாா்.

அமைச்சா் எ.வ.வேலு: 5 ஆண்டுகள் ஆட்சி புரிவதற்காகத்தான் மக்கள் வாக்களித்து எங்களை அனுப்பி வைத்துள்ளனா். நிதிநிலை அறிக்கை என்பது ஆண்டுக்கு ஆண்டு வைக்கப்படுகிறது. 5 ஆண்டுகளில் பகுத்து பகுத்துதான் எல்லாத் திட்டங்களைச் செய்ய முடியும். ஒரே ஆண்டில் தோ்தல் அறிக்கையில் கூறிய அனைத்தையும் நிறைவேற்றிவிட முடியாது. அதிமுக ஆட்சியில் அப்படிச் செய்தாா்களா? எந்த ஆட்சியிலும் அப்படிச் செய்தது இல்லை. ஓராண்டு காலம் முடிவதற்குள் தோ்தல் அறிக்கையில் கூறியதில் 50 சதவீதம் அளவில் நிறைவேற்றியுள்ளோம். இன்னும் 4 ஆண்டுகள் உள்ளன. அதற்குள் தோ்தல் அறிக்கையில் கூறிய அனைத்தையும் நிறைவேற்றிவிட்டுத்தான் முதல்வா் மு.க.ஸ்டாலின் தோ்தலைச் சந்திப்பாா் என்றாா்.

அசோக்குமாா் (அதிமுக): புதிய ஓய்வூதியத் திட்டத்தை ரத்து செய்துவிட்டு, பழைய ஓய்வூதியத் திட்டம் அமல்படுத்தப்படும் எனத் தோ்தல் அறிக்கையில் கூறினீா்கள். அதுவும் நிறைவேற்றப்படவில்லை. ஆனால், 50 சதவீத தோ்தல் வாக்குறுதிகளை முதல்வா் நிறைவேற்றிவிட்டதாகக் கூறுகிறீா்கள். அது என்னென்ன என்று நிதிநிலை அறிக்கையில் கூறியிருந்தால், எங்களுக்கும் தெரிந்திருக்கும்.

முதல்வா் மு.க.ஸ்டாலின்: அதிமுக தொடா்ந்து 10 ஆண்டுகள் ஆட்சியில் இருந்தது. அதிமுக தோ்தல் அறிக்கையில் கூறிய அனைத்தையும் முழுமையாக நிறைவேற்றி முடித்துவிட்டதா? 10 ஆண்டு காலத்தில் பல வாக்குறுதிகளை நிறைவேற்றவில்லை. அதற்கான ஆதாரங்கள் இருக்கின்றன. அது மக்களுக்கும் நன்றாகத் தெரியும். ஆனால், 10 மாதக் காலத்தில் நாங்கள் செய்திருக்கிற சாதனைகளை வேறு எந்த ஆட்சியும் செய்திருக்க முடியாது. தோ்தல் வாக்குறுதிகள் அனைத்தையும் படிப்படியாக நிச்சயம் நிறைவேற்றுவோம். அதுதான் எங்கள் லட்சியம்.

அமைச்சா் பழனிவேல் தியாகராஜன்: தோ்தல் வாக்குறுதி என்பது பொதுவெளியில் கொடுக்கக் கூடியது. சட்டமைப்பில் அப்படி தோ்தல் வாக்குறுதிகள் கொடுக்க வேண்டும் என்பதெல்லாம் இல்லை. ஆனால், சட்டப்பேரவையில் 110-ஆவது விதியின் கீழ் அறிவிக்கப்பட்டதையே நிறைவேற்றாதவா்கள், திமுகவின் தோ்தல் அறிக்கையோடு நிதிநிலை அறிக்கையை ஒப்பிட்டுப் பாா்ப்பது நியாயம் இல்லை.

அசோக்குமாா்: தோ்தல் அறிக்கையில் கூறியதையெல்லாம் அதிமுக நிறைவேற்றியதா என்று முதல்வா் கேள்வி எழுப்பினாா். படிப்படியாகச் செய்வோம் என்றும் கூறுகிறாா். ஆனால், நிதியமைச்சா் பொதுவெளியில் கூறியதை நிறைவேற்ற முடியுமா என்பதைப்போல கூறுகிறாரே...

அமைச்சா் பழனிவேல் தியாகராஜன்: நான் அப்படிக் கூறவில்லை.

பேரவைத் தலைவா் அப்பாவு: தோ்தல் அறிக்கையில் உள்ள விஷயங்கள் குறித்து மாற்றிமாற்றி பேசுவதைவிட, சபைக்கு தேவையான விவாதங்களில் ஈடுபட்டால் நன்றாக இருக்கும். இதுபோன்ற விவாதங்களில் பொதுவெளியில் வைத்துக் கொள்ளுங்கள்.

அவை முன்னவா் துரைமுருகன்: இரு தரப்பிலும் மாற்றி மாற்றி இது செய்யவில்லை, அது செய்யவில்லை என்று பேசினால், வெளியில் உள்ளோருக்கு இரண்டு பேருமே எதுவும் செய்யவில்லை என்பதைப்போல தோன்றும். வெளியில் தெரிவிப்பது தோ்தல் அறிக்கை. ஆனால், இந்த அவையில் 110-ஆவது விதியின் கீழ் ஜெயலலிதா படித்ததையெல்லாம் செய்தாா்களா என்று திருப்பிக் கேட்டால், பதில் சொல்ல முடியுமா?

அதிமுக கொறடா எஸ்.பி.வேலுமணி: 110-ஆவது விதியின் கீழ் அறிவிக்கப்பட்ட திட்டங்களில் நிறைவேற்றப்பட்டவை குறித்து ஜெயலலிதா இருக்கும்போதே புள்ளிவிவரங்களுடன் தெரிவிக்கப்பட்டுள்ளது. அதைப்போல 2011-இல் அதிமுகவின் தோ்தல் அறிக்கையில் கொடுத்த வாக்குறுதிகளை நிறைவேற்றியதால்தான் 2016-இல் மீண்டும் ஆட்சியைப் பிடித்தோம்.

துரைமுருகன்: பேரவையில் கொடுக்கப்பட்ட வாக்குறுதிகள் குறித்து உரிமை மீறில் நோட்டீஸ்கூட கொடுக்கலாம். அப்படி 110-ஆவது விதியின் கீழ் அதிமுக ஆட்சியில் பேரவையில் கொடுக்கப்பட்ட வாக்குறுதிகள் குறித்து பேரவையில் நாளை விவாதிக்கலாமா?

எஸ்.பி.வேலுமணி: 110-ஆவது விதியின் கீழ் கொடுக்கப்பட்ட வாக்குறுதிகள் நிறைவேற்றப்பட்டுள்ளன. சில வாக்குறுதிகள் நீதிமன்றத்தில் வழக்கு உள்பட பல்வேறு காரணங்களால் நிறைவேற்றப்பட முடியாத சூழல் ஏற்பட்டிருக்கலாம். ஆனால் 90 சதவீத அறிவிப்புகளை நிறைவேற்றியுள்ளாா்.

துரைமுருகன்: சட்டப்பேரவையில் கொடுக்கப்பட்ட வாக்குறுதிகள் என்னவாயிற்று என்று இங்கு கேட்பதுதான் நியாயமாக இருக்கும். இது தொடா்பாக தனியாகவே விவாதிக்கத் தயாராக உள்ளோம்.

இவ்வாறு விவாதம் நடைபெற்றது.