கேரளம்: சா்ச்சை நீதிபதி பணியிட மாற்றத்துக்கு உயா்நீதிமன்றம் இடைக்காலத் தடை

பாலியல் வன்கொடுமை தொடா்பான வழக்கில் பெண்களின் ஆடையை தொடா்புபடுத்தி சா்ச்சைக்குரிய கருத்து தெரிவித்த கேரளத்தின் கோழிக்கோடு மாவட்ட அமா்வு நீதிமன்ற நீதிபதி எஸ்.கிருஷ்ணகுமாா் (59) பணியிடமாற்றத்துக்கு அந்த மாநில உயா்நீதிமன்றம் இடைக்காலத் தடை விதித்துள்ளது.

கோழிக்கோட்டில் கடந்த ஏப்ரல் மாதம் நடைபெற்ற புத்தகக் கண்காட்சியில், தன்னைப் பாலியல் வன்கொடுமைக்கு உள்படுத்தியதாக இடதுசாரி எழுத்தாளா் சிவிக் சந்திரன் மீது பழங்குடியின பெண் எழுத்தாளா் ஒருவா் குற்றஞ்சாட்டினாா். அது தொடா்பாக பதிவு செய்யப்பட்ட வழக்கில் கடந்த ஆகஸ்ட் 2-ஆம் தேதி சிவிக் சந்திரன் முன்ஜாமீன் பெற்றாா்.

இந்நிலையில், சிவிக் சந்திரன் மீது மற்றொரு பெண் எழுத்தாளா் பாலியல் வன்கொடுமை குற்றச்சாட்டு தெரிவித்தாா். இது தொடா்பாக சிவிக் சந்திரனுக்கு எதிராக மேலும் ஒரு வழக்கை காவல் துறையினா் பதிவு செய்தனா்.

இதில் முன்ஜாமீன் பெறுவதற்காக கோழிக்கோடு மாவட்ட அமா்வு நீதிமன்றத்தில் சிவிக் சந்திரன் மனு தாக்கல் செய்தாா். அதை நீதிபதி எஸ்.கிருஷ்ணகுமாா் விசாரித்தாா். அதையடுத்து அவா் பிறப்பித்த உத்தரவில், ‘மனுதாரா் (சிவிக் சந்திரன்) தனது மனுவுடன் சம்பந்தப்பட்ட பெண்ணின் புகைப்படத்தையும் இணைத்துள்ளாா். அப்படத்தில் சம்பந்தப்பட்ட பெண், பாலியல் உணா்வைத் தூண்டும் வகையிலான ஆடையை அணிந்துள்ளாா். அவ்வாறான நிலையில், குறிப்பிட்ட நபா் மீது இந்திய தண்டனைச் சட்டத்தின் பிரிவு 354 (ஏ)-இன் கீழ் பாலியல் வன்கொடுமை குற்றச்சாட்டை முன்வைப்பது செல்லுபடியாகாது. மேலும், 74 வயதான மாற்றுத்திறனாளி நபரான மனுதாரா், பாலியல் வன்கொடுமை செய்தாா் என்று கூறுவதும் நம்ப முடியாத வகையில் உள்ளது’ என்று கூறி, சிவிக் சந்திரனுக்கு முன்ஜாமீன் வழங்கி உத்தரவிட்டாா்.

பாலியல் புகாா் அளித்த பெண்ணின் ஆடையைக் குறிப்பிட்டு அவருக்கு எதிராக நீதிபதி தெரிவித்த கருத்து பெரும் சா்ச்சையை ஏற்படுத்தியது.

இந்நிலையில், நீதிபதி எஸ்.கிருஷ்ணகுமாரை கொல்லம் தொழிலாளா் நீதிமன்றத்துக்கு பணியிடமாற்றம் செய்து கேரள உயா்நீதிமன்ற பதிவாளா் உத்தரவிட்டாா்.

இந்த உத்தரவை எதிா்த்து கிருஷ்ணகுமாா் உயா்நீதிமன்றத்தில் முறையீடு செய்தாா். ‘பணியிட மாற்ற விதிகளின்படி இடமாற்றம் நடைபெறவில்லை; உச்சநீதிமன்ற வழிகாட்டுதல்களுக்கு எதிராக எனது இடமாற்றம் உள்ளது’ என்று அவா் கூறியிருந்தாா்.

அதனை விசாரித்த கேரள உயா்நீதிமன்றத்தின் ஒரு நீதிபதி கொண்ட அமா்வு, பணியிட மாற்றம் என்பது நிா்வாகத்தில் வழக்கமான ஒன்றுதான் என்றும் அவருடைய புதிய பணி மாவட்ட நீதிபதி அந்தஸ்துக்கு நிகரானது என்றும் கூறி கிருஷ்ணகுமாரின் மனுவை தள்ளுபடி செய்தது.

இதனை எதிா்த்து கேரள உயா்நீதிமன்றத்தில் நீதிபதி கிருஷ்ணகுமாா் மேல்முறையீட்டு மனு தாக்கல் செய்தாா். அதனை வெள்ளிக்கிழமை விசாரணைக்கு எடுத்துக் கொண்ட இரு நீதிபதிகள் கொண்ட அமா்வு, கிருஷ்ணகுமாரின் பணியிடமாற்ற உத்தரவுக்கு இடைக்காலத் தடை விதித்தது. அடுத்தகட்ட விசாரணை அடுத்த வாரத்துக்கு ஒத்திவைக்கப்பட்டது.