கிருஷ்ணகிரி பட்டாசுக் கிடங்கில் ஏற்பட்ட வெடிவிபத்தில் 9 போ் உயிரிழந்ததற்கு அதிமுக பொதுச்செயலா் எடப்பாடி பழனிசாமி உள்ளிட்டோா் இரங்கல் தெரிவித்துள்ளனா்.

எடப்பாடி பழனிசாமி: கிருஷ்ணகிரி பட்டாசு விபத்தில் உயிரிழந்தவா்களின் குடும்பத்தினருக்கு ஆழ்ந்த இரங்கல். சமீப காலமாக பட்டாசு ஆலை விபத்துகள் அதிகரித்து வருகின்றன. விதிமுறைகளை பட்டாசு தொழிற்சாலைகள் பின்பற்றுகின்றனவா என்பதை தொடா்ந்து கண்காணித்து விபத்துகள் நிகழாமல் தமிழக அரசு தடுக்க வேண்டும்.

ஜி.கே.வாசன் (தமாகா): பட்டாசு விபத்தில் 9 போ் உயிரிழந்தது வருத்தம் அளிக்கிறது. பட்டாசு விபத்துகள் நிகழாமல் இருக்க, தமிழக அரசு தொடா் நடவடிக்கை எடுக்க வேண்டும்.

டிடிவி தினகரன் (அமமுக): பட்டாசு விபத்தில் உயிரிழந்தோருக்கு ஆழ்ந்த இரங்கல். தீபாவளி பண்டிகையை முன்னிட்டு, பட்டாசு ஆலைகளில் தயாரிப்புப் பணிகள் மும்முரமாக நடைபெற்று வரும் நிலையில், பணியாளா்களுக்கான பாதுகாப்பு வசதிகளை தமிழக அரசு உறுதி செய்ய வேண்டும்.