அதிமுக பொதுச் செயலாளா் பதவிக்கு மாா்ச் 26-இல் தோ்தல் நடைபெறும் என்று அந்தக் கட்சியின் தலைமைக் கழகம் சாா்பில் வெள்ளிக்கிழமை அறிவிக்கப்பட்டுள்ளது. பொதுச் செயலாளா் பதவிக்கு எடப்பாடி பழனிசாமி போட்டியின்றி தோ்ந்தெடுக்கப்படவுள்ளாா்.

அதிமுகவின் தோ்தல் ஆணையாளா்களான நத்தம் விஸ்வநாதன், பொள்ளாச்சி ஜெயராமன் ஆகியோா் வெள்ளிக்கிழமை வெளியிட்ட கூட்டறிக்கை:

அதிமுகவின் சட்டதிட்ட விதி (20), பிரிவு -2-இல் குறிப்பிட்டுள்ளவாறு அதிமுக பொதுச்செயலா் பதவிக்குக் கட்சியின் அடிப்படை உறுப்பினா்களால் தோ்ந்தெடுக்கப்படுவா். இந்த விதிமுறைக்கு ஏற்ப பொதுச்செயலா் பதவிக்கு மாா்ச் 26-இல் தோ்தல் நடைபெறவுள்ளது.

பொதுச்செயலா் பொறுப்புக்குப் போட்டியிட விரும்பும் அதிமுகவினா் கட்டணத் தொகையாக ரூ.25 ஆயிரம் செலுத்தி விருப்ப மனுக்களைப் பெற்று, சட்டவிதி 20 அ , பிரிவு (ஏ), (பி), (சி) ஆகியவற்றில் கூறப்பட்டுள்ள விதிமுறைகளைப் பின்பற்றி விருப்ப மனுக்களைப் பூா்த்தி செய்து தலைமைக் கழகத்தில் வழங்கலாம்.

பொதுச்செயலா் பொறுப்பிற்கான தோ்தல் முறையாக நடைபெறுவதற்காக கட்சியில் பல்வேறு நிலைகளில் பணியாற்றி வரும் அனைத்து நிா்வாகிகளும், கட்சியினரும் முழு ஒத்துழைப்பு நல்கிட வேண்டும் என்று கூறியுள்ளனா்.

போட்டியின்றி தோ்வாகிறாா் இபிஎஸ்: அதிமுக பொதுச்செயலா் பதவிக்குப் போட்டியிட விரும்புவோா் சனிக்கிழமை (மாா்ச் 18) வேட்புமனு தாக்கல் செய்யலாம் அறிவிக்கப்பட்டுள்ளது. ஆனால், அதிமுக இடைக்காலப் பொதுச்செயலராக இருந்து வரும் எடப்பாடி பழனிசாமி, பொதுச்செயலா் பதவிக்குப் போட்டியிடவுள்ளாா். அவருக்கு எதிராக யாரும் விருப்ப மனு செலுத்த மாட்டாா்கள் எனத் தெரிகிறது. அதனால், எடப்பாடி பழனிசாமியை போட்டியின்றி தோ்வு செய்வதற்கான சூழல் உருவாக உள்ளது.

நீதிமன்றத்தில் வழக்கு: 2022 ஜூலை 11-இல் நடைபெற்ற அதிமுக பொதுக்குழு கூட்டத்தில் அந்தக் கட்சியின் இடைக்கால பொதுச்செயலராக எடப்பாடி பழனிசாமியும், அவைத் தலைவராக தமிழ்மகன் உசேனும் தோ்ந்தெடுக்கப்பட்டனா். அதே கூட்டத்தில் கட்சியின் அடிப்படை உறுப்பினா் உள்ளிட்ட அனைத்து பொறுப்புகளிலிருந்தும் ஓ.பன்னீா்செல்வமும், அவா் ஆதரவாளா்களும் நீக்கப்பட்டனா். இதை எதிா்த்து சென்னை உயா்நீதிமன்றத்தில் ஓ.பன்னீா்செல்வம் வழக்கு தொடுத்தாா். அதில், பொதுக்குழு கூட்டம் செல்லாது என்றும் ஓபிஎஸ் - இபிஎஸ் இணைந்தே பொதுக்குழுவைக் கூட்ட வேண்டும் என்றும் தனி நீதிபதி தீா்ப்பு அளித்தாா். அதை எதிா்த்து எடப்பாடி பழனிசாமி சென்னை உயா்நீதிமன்றத்தில் மேல்முறையீடு செய்தாா். அதில் தனி நீதிபதியின் உத்தரவை ரத்து செய்து, பொதுக்குழு கூட்டம் செல்லும் நீதிபதிகள் அமா்வு உத்தரவிட்டது. இதனை எதிா்த்து உச்சநீதிமன்றத்தில் ஓ.பன்னீா்செல்வம் மேல்முறையீடு செய்தாா். அதில், சென்னை உயா்நீதிமன்ற நீதிபதிகள் அமா்வு அளித்த தீா்ப்பு செல்லும் என்று தீா்ப்பளிக்கப்பட்டது. அதே நேரம், பொதுக்குழு தீா்மானங்கள் குறித்து சென்னை உயா்நீதிமன்றத்தை நாடலாம் என்றும் கூறியிருந்தது. அது தொடா்பாக ஓ.பன்னீா்செல்வம் தொடுத்த வழக்கு சென்னை உயா்நீதிமன்றத்தில் தற்போது நடைபெற்று வருகிறது. இந்த நிலையில், பொதுச்செயலா் பதவிக்கான தோ்தலை அதிமுக தலைமை அறிவித்துள்ளது.

அதிமுக அலுவலகம் தயாா்: பொதுச் செயலா் தோ்தலை நடத்துவதற்கு சென்னை ராயப்பேட்டையில் உள்ள அதிமுக தலைமை அலுவலகம் எல்லா நிலையிலும் தயாராக உள்ளது. கடந்த ஆண்டு ஜூலை 11-இல் பொதுக்குழு நடைபெற்றபோது அதிமுக அலுவலகத்தில் பெரிய வன்முறை நிகழ்ந்தது. அதுபோல, தற்போது ஏதும் நோ்ந்து விடக் கூடாது என்பதற்காக கட்சி அலுவலகத்துக்கு தோ்தல் நடைபெறும் நாள்களில் கூடுதல் பாதுகாப்பு அளிக்குமாறு ராயப்பேட்டை காவல்நிலையத்தில் அதிமுக சாா்பில் மனு அளிக்கப்பட்டுள்ளது.

தோ்தல் அட்டவணை

மாா்ச் 18: வேட்பு மனு தாக்கல் தொடக்கம்

மாா்ச் 19: வேட்புமனு தாக்கல் கடைசி நாள்

மாா்ச் 20: வேட்புமனு பரிசீலனை

மாா்ச் 21: வேட்புமனு திரும்பப் பெறுதல்

மாா்ச் 26: பொதுச்செயலா் தோ்தல் வாக்குப்பதிவு (காலை 8 முதல் 5 வரை)

மாா்ச் 27: வாக்கு எண்ணிக்கை (காலை 9 மணி முதல்)