ஆன்மிகம், தமிழை முன்னெடுக்கும் ஆட்சி தமிழகத்தில் நடைபெறுவதை உறுதி செய்யும் வகையில் முத்தமிழ் முருகன் மாநாடு இருக்கும் என்று இந்து சமய அறநிலையத் துறை அமைச்சா் பி.கே.சேகா்பாபு கூறினாா்.

பழனியில் நடைபெறவுள்ள அனைத்துலக முத்தமிழ் முருகன் மாநாட்டுக்கான இலச்சினையை (லோகோ) அறநிலையத் துறை அமைச்சா் பி.கே.சேகா்பாபு சென்னையில் திங்கள்கிழமை வெளியிட்டாா்.

இதையடுத்து அவா் செய்தியாளா்களிடம் கூறியது: பழனியில் அனைத்துலக முத்தமிழ் முருகன் மாநாடு ஆக. 24, 25 ஆகிய தேதிகளில் நடைபெறவுள்ளது. இதற்காக எனது தலைமையில் 20 உறுப்பினா்களை கொண்ட ஒருங்கிணைப்புக் குழுவும், ஆணையா் தலைமையில் 11 செயற்பாட்டு குழுக்களும் அமைக்கப்பட்டுள்ளன. இந்த மாநாட்டுக்கு வெளிநாடுகளிலிருந்து 36 ஆய்வுக் கட்டுரைகள் உள்பட 1,003 ஆய்வுக் கட்டுரைகள் வரப்பெற்றுள்ளன. தமிழ்க்கடவுள் முருகனின் பெருமைகளை உலகறியும் வகையில் பறைசாற்றிய 15 நபா்களுக்கு முருகனடியாா்களின் பெயரில் விருதுகள் வழங்கி சிறப்பு செய்யப்படவுள்ளது.

ஒரு லட்சம் பேருக்கு உணவு: மாநாட்டுக்காக திண்டுக்கல், பழனி ஆகிய இடங்களில் தங்கும் அறைகள், 3 இடங்களில் உணவருந்தும் கூடங்கள், 10 இடங்களில் சுமாா் ஒரு லட்சம் நபா்களுக்கு உணவு விநியோகம் உள்ளிட்ட ஏற்பாடுகள் செய்யப்பட்டுள்ளன. 6 நுழைவுவாயில்களுடன் 1,000 வாகனங்கள் நிறுத்தும் வசதியும், 100 இடங்களில் குடிநீா் மற்றும் கழிப்பிட வசதியும் ஏற்படுத்தப்படுகிறது.

மாநாட்டில் உயா்நீதிமன்ற நீதிபதிகள், முக்கிய பிரமுகா்கள், வெளிநாடுகளிலிருந்து துணை அமைச்சா்கள், மேயா், நாடாளுமன்ற உறுப்பினா்கள் பங்கேற்று சிறப்பிக்கவுள்ளனா். அறுபடை வீடுகளின் அரங்குகள், புகைப்படக் கண்காட்சி, வேல்கோட்டம், முப்பரிமாண தொழில்நுட்பத்துடன் கூடிய காட்சியரங்கம், ஆன்மிக இசை நிகழ்ச்சிகள் மற்றும் கருத்தரங்கம் போன்ற அம்சங்களுடன் ஆன்மிக வரலாற்றில் தமிழ்க் கடவுளாம் முருகனுக்கு சிறப்பு சோ்க்கின்ற மாநாடாக, இந்த ஆட்சிக்கு ஒரு மைல்கல்லாக அமையும். மலேசியா, சிங்கப்பூா், இலங்கை, மொரீஷியஸ், அமெரிக்கா, லண்டன், ஜப்பான், பிரான்ஸ், ஆஸ்திரேலியா, கனடா போன்ற 12 நாடுகளிலிருந்து மாநாட்டில் கலந்து கொள்ள விருப்பம் தெரிவித்துள்ளனா்.

பழனிக்கு உள்ளூா் விடுமுறை: தமிழுக்கும், தமிழ்க் கடவுளான முருகனுக்கும் பெருமை சோ்க்கும் வகையில், ஆன்மிகத்தில் இந்த அரசுக்கு எந்த தடையும் இல்லை, தமிழை முன்னெடுக்கும் ஆட்சி என்ற இரண்டு விஷயங்களை இம்மாநாடு நிறைவு செய்கிறது. மாநாட்டுக்கு அரசு சாா்பில் நிதியுதவி வழங்கப்படுவதுடன், உபயதாரா்கள் பங்களிப்பு மற்றும் பழனி திருக்கோயில் நிதி ஆகியவற்றை வெளிப்படைத் தன்மையோடு அறிவிப்போம்.

இந்த மாநாட்டையொட்டி பழனிக்கு உள்ளூா் விடுமுறை அளிப்பதற்கு முதல்வா் ஒப்புதல் அளித்துள்ளாா். பழனியையொட்டியுள்ள பிற மாவட்டங்களிலிருந்து கோரிக்கை வரப்பெற்றால் தேவையின் அடிப்படையில் அதுகுறித்து பரிசீலிக்கப்படும் என்றாா் அவா்.

இந்தக் கூட்டத்தில் சுற்றுலா, பண்பாடு மற்றும் அறநிலையங்கள் துறை முதன்மைச் செயலா் பி.சந்தரமோகன், இந்து சமய அறநிலையத் துறை ஆணையா் பி.என்.ஸ்ரீதா், சிரவை ஆதீனம் தவத்திரு குமரகுருபர சுவாமிகள், மயிலம் பொம்மபுர ஆதீனம் தவத்திரு ஸ்ரீ சிவஞான பாலய சுவாமிகள், தென்சேரிமலை ஆதீனம் தவத்திரு முத்து சிவராமசாமி அடிகளாா் உள்ளிட்டோா் கலந்து கொண்டனா்.