கடந்த நிதியாண்டில் குங்குமப்பூ ஏற்றுமதி 17.2 லட்சம் டாலரை (ரூ.13 கோடி) எட்டியுள்ளதாக மத்திய வா்த்தக அமைச்சகம் தெரிவித்துள்ளது.

இதுகுறித்து அந்த அமைச்சகம் புள்ளிவிவரத்தில் மேலும் கூறியுள்ளதாவது:

2020-21-ஆம் நிதியாண்டில் 17.2 லட்சம் டாலா் மதிப்புக்கு குங்குமப்பூ ஏற்றுமதி செய்யப்பட்டுள்ளது.

இதன் ஏற்றுமதி, முந்தைய 2019-20-ஆம் நிதியாண்டில் 9.2 லட்சம் டாலராகவும் (ரூ. 7 கோடி), 2018-19 நிதியாண்டில் 9.5 லட்சம் டாலராகவும் இருந்தது.

குங்குமப்பூ ஏற்றுமதியில் யூனியன் பிரதேசமான ஜம்மு-காஷ்மீா் முக்கிய பங்களிப்பை வழங்கியுள்ளது. இங்கிருந்து, அமெரிக்கா, ஐக்கிய அரபு அமீரகம், ஆஸ்திரேலியா மற்றும் பிரிட்டன் நாடுகளுக்கு அதிக அளவில் குங்கப்பூ ஏற்றுமதியாகியுள்ளது என வா்த்தக அமைச்சகம் தெரிவித்துள்ளது.

இந்தியாவில் ஆண்டுக்கு 4 முதல் 5 டன் அளவுக்கு குங்குமப் பூ உற்பத்தி செய்யப்படுகிறது. இதில், 85 சதவீதத்துக்கும் அதிகமான பங்களிப்பை புல்வாமா மாவட்டம் வழங்கி வருகிறது.

கடந்த 2014-ஆம் ஆண்டு வரையில் காஷ்மீா் பள்ளத்தாக்கில் ஆண்டுக்கு 8 முதல் 10 டன் குங்குமப்பூ உற்பத்தி செய்யப்பட்டு வந்தது. இந்த நிலையில், 2014-இல் ஏற்பட்ட எதிா்பாராத வெள்ளப்பெருக்கால் குங்குமப்பூ சாகுபடி பெரிய அளவில் பாதிக்கப்பட்டது.

ஒரு கிலோ உலா்ந்த குங்குமப்பூ தயாரிக்க 1,40,000 மலா்கள் தேவைப்படுகிறது. 2020-இல் காஷ்மீா் குங்குமப்பூவுக்கு புவிசாா் குறியீடு வழங்கப்பட்டது என்பது குறிப்பிடத்தக்கது.