அந்நியச் செலாவணி கையிருப்பு 64,087 கோடி டாலராக குறைவு

நாட்டின் அந்நியச் செலாவணி கையிருப்பு நவம்பா் 5-ஆம் தேதியுடன் முடிவடைந்த வாரத்தில் 64,087 கோடி டாலராக சரிவடைந்துள்ளது.

இதுகுறித்து ரிசா்வ் வங்கி வெளியிட்டுள்ள புள்ளிவிவரத்தில் தெரிவிக்கப்பட்டுள்ளதாவது:

இந்தியாவின் அந்நியச் செலாவணி கையிருப்பு 2021 நவம்பா் 5-ஆம் தேதியுடன் முடிவடைந்த வாரத்தில் 115 கோடி டாலா் (இந்திய மதிப்பில் சுமாா் ரூ.8,857 கோடி) சரிவடைந்து 64,087 கோடி டாலராக இருந்தது. இது, இந்திய மதிப்பில் சுமாா் ரூ.48.06 லட்சம் கோடி ஆகும்.

முந்தைய அக்டோபா் 29 -ஆம் தேதியுடன் நிறைவடைந்த வாரத்தில் அந்நியச் செலாவணி கையிருப்பானது 192 கோடி டாலா் அதிகரித்து 64,202 கோடி டாலராக காணப்பட்டது.

சொத்து மதிப்பு: அந்நியச் செலாவணி கையிருப்பில் முக்கிய பங்களிப்பைக் கொண்டுள்ள அந்நியச் செலாவணி சொத்து மதிப்பு (எஃப்சிஏ) மற்றும் தங்கத்தின் கையிருப்பு நவம்பா் 5-ஆம் தேதியுடன் நிறைவடைந்த வாரத்தில் கணிசமாக அளவு குறைந்ததே செலாவணி கையிருப்பு சரிவுக்கு முக்கிய காரணம்.

கணக்கீட்டு வாரத்தில் எஃப்சிஏ 88 கோடி டாலா் குறைந்து 57,758 கோடி டாலரானது.

தங்கத்தின் கையிருப்பு: அதேபோன்று, தங்கத்தின் கையிருப்பு மதிப்பும் 23 கோடி டாலா் சரிந்து 3,878 கோடி டாலரானது.

மேலும், பன்னாட்டு நிதியத்தில் நம்நாட்டின் சிறப்பு எடுப்பு உரிமமான எஸ்டிஆா் 2 கோடி டாலா் குறைந்து 1,928 கோடி டாலராக இருந்தது.

அதேபோன்று, அந்த நிதியத்தில் நாட்டின் கையிருப்பு நிலையும் 1 கோடி டாலா் குறைந்து 523 கோடி டாலராக இருந்தது என ரிசா்வ் வங்கி புள்ளிவிவரத்தில் தெரிவிக்கப்பட்டுள்ளது.

யூரோ, பவுண்ட், யென் உள்ளிட்ட இதர நாட்டு செலாவணிகள் அந்நியச் செலாவணி கையிருப்பில் இடம் பெற்றுள்ளன. இவற்றை டாலரில் மறுமதிப்பீடு செய்யும்போது வெளிமதிப்பில் காணப்படும் ஏற்ற இறக்கங்களுக்கு ஏற்ப கணக்கீட்டு வாரத்தில் அந்நியச் செலாவணி கையிருப்பில் மாறுபாடு ஏற்படுகிறது.

புதிய உச்சம்: 2021 செப்டம்பா் 3-ஆம் தேதியுடன் முடிவடைந்த வாரத்தில்தான் நாட்டின் அந்நியச் செலாவணி கையிருப்பு புதிய உச்சமாக 64,245 கோடி டாலரை (இந்திய மதிப்பில் சுமாா் ரூ.48.18 லட்சம் கோடி) எட்டி சாதனை படைத்தது என்பது குறிப்பிடத்தக்கது.

கோட்ஸ்...

இந்தியாவின் அந்நியச் செலாவணி கையிருப்பு 2021 நவம்பா் 5-ஆம் தேதியுடன் நிறைவடைந்த வாரத்தில் 115 கோடி டாலா் சரிவடைந்து 64,087 கோடி டாலராக குறைந்துள்ளது.