யெஸ் வங்கி கடந்த நிதியாண்டில் லாப பாதைக்கு திரும்பி நான்காவது காலாண்டில் ரூ.367 கோடி நிகர லாபத்தை பதிவு செய்துள்ளது. அதேசமயம், முந்தைய 2020-21 நிதியாண்டின் நான்காவது காலாண்டில் இவ்வங்கி ரூ.3,788 கோடி நிகர இழப்பைக் கண்டிருந்தது.

2021-22 முழு நிதியாண்டில் இவ்வங்கியின் நிகர லாபம் ரூ.1,066 கோடியை எட்டியது. அதேசமயம், 2021 மாா்ச் மாதத்துடன் முடிவடைந்த 2020-21 நிதியாண்டில் ரூ.3,462 கோடி நிகர இழப்பையும், 2019-20-இல் ரூ.22,715 இழப்பையும் யெஸ் வங்கி சந்தித்தது.

கடந்த 2021-22 நிதியாண்டின் ஜனவரி-மாா்ச் காலாண்டில் இவ்வங்கியின் வருவாய் ரூ.4,678.59 கோடியிலிருந்து ரூ.5,829.22 கோடியாக அதிகரித்தது. முழு நிதியாண்டில் வருவாய் ரூ.23,053.53 கோடியிலிருந்து ரூ.22,285.98 கோடியாக குறைந்துள்ளது.

கடந்த மாா்ச் 31 நிலவரப்படி வழங்கப்பட்ட கடனில் மொத்த வாராக் கடன் 15.4 சதவீதத்திலிருந்து 13.9 சதவீதமாகவும், நிகர வாராக் கடனளவு 5.9 சதவீதத்திலிருந்து 4.5 சதவீதமாகவும் குறைந்துள்ளதாக யெஸ் வங்கி பங்குச் சந்தையிடம் தெரிவித்துள்ளது.