இந்தியாவின் முன்னணி இரண்டு மற்றும் மூன்று சக்கர வாகன நிறுவனங்களில் ஒன்றான டிவிஎஸ் மோட்டாரின் நிகர லாபம் கடந்த ஜூன் காலாண்டில் ரூ.461 கோடியாக உயா்ந்துள்ளது.

இது குறித்து நிறுவனம் வெளியிட்டுள்ள அறிக்கையில் தெரிவிக்கப்பட்டுள்ளதாவது:

கடந்த ஏப்ரல்-ஜூன் காலாண்டில் நிறுவனத்தின் ஒருங்கிணைந்த நிகர லாபம் 6 சதவீதம் அதிகரித்து ரூ.461 கோடியாக உள்ளது. முந்தைய 2023-24-ஆம் நிதியாண்டின் இதே காலாண்டில் நிறுவனம் ரூ.434 கோடி நிகர லாபம் ஈட்டியிருந்தது.

மதிப்பீட்டுக் காலாண்டில் நிறுவனத்தின் மொத்த வருமானம் ரூ.9,142 கோடியிலிருந்து ரூ.10,448 கோடியாக உயா்ந்துள்ளது.

ஏப்ரல்-ஜூன் காலாண்டில் நிறுவன வாகனங்களின் ஏற்றுமதி உள்ளிட்ட ஒட்டுமொத்த விற்பனை 9.53 லட்சத்திலிருந்து 14 சதவீதம் வளா்ச்சியடைந்து 10.87 லட்சமாகியுள்ளது என்று அந்த அறிக்கையில் தெரிவிக்கப்பட்டுள்ளது.