கடந்த செப்டம்பா் காலாண்டில் டாடா மோட்டாா்ஸ் குழுமத்தின் உலகளாவிய மொத்த விற்பனை 11 சதவீதம் சரிந்துள்ளது.

இது குறித்து நிறுவனம் வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:

செப்டம்பா் மாதத்துடன் நிறைவடைந்த நடப்பு நிதியாண்டின் இரண்டாவது காலாண்டில் குழுமத்தின் உலகளாவிய மொத்த விற்பனை 3,04,189-ஆக உள்ளது. 2023-24-ஆம் நிதியாண்டின் இதே காலாண்டோடு ஒப்பிடுகையில் இது 11 சதவீதம் குறைவு.

ஜாகுவாா் லேண்ட் ரோவா் உள்ளிட்ட டாடா மோட்டாா்ஸ் குழும நிறுவனங்களின் உலகளாவிய பயணிகள் வாகன விற்பனை மதிப்பீட்டு மாதத்தில் 1,30,753-ஆக உள்ளது. இது, முந்தைய 2023-24-ஆம் நிதியாண்டின் இதே காலகட்டத்தோடு ஒப்பிடுகையில் 6 சதவீதம் குறைவு.

கடந்த ஜூலை-செப்டம்பா் காலகட்டத்தில் ஜாகுவாா் லேண்ட் ரோவரின் உலகளாவிய மொத்த விற்பனை 10 சதவீதம் குறைந்து 87,303-ஆக உள்ளது. அந்தக் காலாண்டில் 5,961 ஜாகுவாா் வாகனங்கள், 81,342 லேண்ட் ரோவா் வாகனங்கள் விற்பனையாகின என்று அந்த அறிக்கையில் குறிப்பிடப்பட்டுள்ளது.