புது தில்லி: இந்தியாவின் மின் நுகா்வு கடந்த ஆகஸ்ட் மாதத்தில் 14,421 கோடி யூனிட்டுகளாகக் குறைந்துள்ளது.

இது குறித்து அரசின் புள்ளிவிவரங்கள் தெரிவிப்பதாவது:

கடந்த ஆகஸ்ட் மாதத்தில் நாட்டின் மின் நுகா்வு 14,421 கோடி யூனிட்டுகளாகப் பதிவாகியுள்ளது. முந்தைய 2023-ஆம் ஆண்டின் அதே மாதத்தோடு ஒப்பிடுகையில் இது 4.7 சதவீதம் குறைவாகும். அப்போது இந்தியாவின் மின் நுகா்வு 15,132 கோடியாக இருந்தது.

இந்திய வானிலை ஆய்வகத் தரவுகளின்படி, கடந்த ஆகஸ்ட் மாதத்தில் நாடு முழுவதும் சராசரியாக 287.1 மி.மீ மழை பதிவாகியுள்ளது. இது வழக்கமான 248.1 மி.மீ மழையை விட 16 சதவீதம் அதிகமாகும்.

இதனால் வெப்பநிலை குறைந்து வீடுகளிலும் பிற இடங்களிலும் குளிரூட்டிகளை இயக்க வேண்டியதன் அவசியம் குறைந்தது. இது, கடந்த ஆகஸ்ட்டில் மின் நுகா்வுக் குறைந்ததில் முக்கிய பங்கு வகித்தது.

மதிப்பீட்டு மாதத்தில் ஒரு நாள் உச்சபட்ச மின் தேவை 216.68 ஜிகாவாட்டாகக் குறைந்தது. இது 2023-ஆம் ஆண்டின் இதே மாதத்தில் 236.29 ஜிகாவாட்டாக இருந்தது என்று அந்த புள்ளிவிவரங்கள் தெரிவிக்கின்றன.