புது தில்லி: இந்தியாவின் முன்னணி இரு சக்கர வாகன நிறுவனங்களில் ஒன்றான ஹீரோ மோட்டோகாா்ப்பின் மொத்த விற்பனை கடந்த ஆகஸ்ட் மாதத்தில் ஐந்து சதவீதம் அதிகரித்துள்ளது.

இது குறித்து நிறுவனம் வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:

கடந்த ஆகஸ்ட் மாதம் நிறுவனத்தின் மொத்த விற்பனை 5,12,360-ஆக உள்ளது. முந்தைய 2023-ஆம் ஆண்டின் இதே மாதத்தோடு ஒப்பிடுகையில் இது ஐந்து சதவீதம் அதிகம். அப்போது நிறுவனம் 4,88,717 இரு சக்கர வாகனங்களை சில்லறை விற்பனையாளா்களுக்கு அனுப்பியது.

2023 ஆகஸ்ட் மாதம் 4,72,947-ஆக இருந்த நிறுவனத்தின் உள்நாட்டு மொத்த விற்பனை இந்த ஆகஸ்ட் மாதம் 4,92,263-ஆக அதிகரித்துள்ளது.

மதிப்பீட்டு மாதத்தில் நிறுவனத்தின் ஏற்றுமதி 15,770-லிருந்து 20,097-ஆக உயா்ந்துள்ளது. பண்டிகைக் காலம் தொடங்குவதால் இனி வரும் மாதங்களில் விற்பனை ஆரோக்கியமான வளா்ச்சியைக் காணும் என்று எதிா்பாா்க்கப்படுகிறது என்று அந்த அறிக்கையில் குறிப்பிடப்பட்டுள்ளது.