இந்தியாவின் மிகப் பெரிய வங்கியான பாரத ஸ்டேட் வங்கி (எஸ்பிஐ), தங்களிடம் முதலீடு செய்யப்படும் வைப்பு நிதிக்கான வட்டி விகிதங்களை 20 அடிப்படைப் புள்ளிகள் (0.2 சதவீதம்) குறைத்துள்ளது.

இதுகுறித்து வங்கி வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது: நிலை வைப்பு நிதிக்கான வட்டி விகிதங்கள் 20 அடிப்படைப் புள்ளிகள் (0.2 சதவீதம்) குறைக்கப்பட்டுள்ளன.

கடந்த 16-ஆம் தேதிமுதல் அமலுக்கு வந்துள்ள இந்த வட்டி விகிதக் குறைப்பு குறிப்பிட்ட பருவகாலம் கொண்ட வைப்பு நிதிக்கு மட்டும் பொருந்தும்.

அதன்படி, இனி 2 ஆண்டுகள் முதல் 3 ஆண்டுகளுக்குக் கீழ் உள்ள வைப்பு நிதிக்கு 6.7 சதவீதமாகவும், 3 ஆண்டுகள் முதல் 5 ஆண்டுகளுக்கு கீழ் உள்ள வைப்பு நிதிக்கு 6.55 சதவீதமாகவும் வட்டி விகிதம் இருக்கும்.

5 ஆண்டுகள் முதல் 10 ஆண்டுகள் வரையிலான வைப்பு நிதிக்கு வட்டி விகிதம் 6.3 சதவீதமாகவும், 1 ஆண்டு முதல் 2 ஆண்டுகளுக்கு கீழ் உள்ள வைப்பு நிதிக்கு 6.5 சதவீதமாகவும் இருக்கும்.

குறிப்பிட்ட பருவகாலத் திட்டமான ‘அம்ரித் வ்ரிஷ்டி’ (444 நாள்கள்) வைப்பு நிதிக்கான வட்டி விகிதம் 7.05 சதவீதத்தில் இருந்து 6.85 சதவீதமாகக் குறைக்கப்பட்டுள்ளது என்று அந்த செய்திக்குறிப்பில் தெரிவிக்கப்பட்டுள்ளது.