அச்சடித்த காகிதமே  அழகான பணமானது!
எச்சில் தொட்டு எண்ணுகையில் சுகமானது!
பச்சிளம் குழந்தையின் பசியாற துணையானது!
பச்சைமட்டை ஓலையின் பயணத்திற்கும் பயனானது!

வாசல்வந்து தலைவணங்கி வாக்குகளின் செலவாவது
தேசநலன் காத்திருக்கும் திடவீரர்களுக்கோ சிறிதாவது!
ஆசையசையாய் சேர்த்திட அலையளவுக்கு நிகரானது!
மோசம்போன பின்னாலே முணுமுணுத்து புலம்பலாக்குவது!

கடுகு-டப்பாவில்  கட்டாகத்தான் கணக்காய் ஒளிந்திருப்பது!
சட்டெனவே வருகின்ற செலவுகளுக்கும் தோழனாவது!
கட்டுக்கட்டாய் காகிதங்களாய் மூட்டையாய் அடைக்கலமானது!
தட்டேந்தும் பிச்சைக்காரரிடமும் தாராளமாய்  இருப்பது

ஒரேநாளில் செல்லாதென்று ஒளிந்தே கொண்டது!
மறுநாளில் வங்கிவாசல்களில் மந்தையாக நிற்கவைத்தது!
ஆறேழு கோடிகள் கடனெனினும் அரவணைத்து கொள்வது!
ஆறுலட்சம் நிலுவையெனின் அமீனாவை வரவழைப்பதுவே!