கோடைமழை ஆங்காங்கே குறு மழையாய் பெய்தாலும்
கோடை இடி மின்னலுடன் கொட்டித் தீர்த்தாலும்
கூடுதல் மகிழ்ச்சிக்கு குறைவில்லை; துன்பமில்லை;
கேடுதரும் வெப்பத்தை சிறிதாய்த் தணித்து வைப்பதால்.
வெப்ப நோய்கள் விலகிடும்; வீரிய பிணிகள் குறைந்திடும்;
கப்பிய தாகம் தீர்த்திடும்; கால் நடைகளும் பிழைத்திடும்;
வெடிப்புகள் நீங்கிடும் நிலத்தில் ; உழவர் கலப்பையை
துடிப்புடன் ஒட்டி மென்மையாக்கி மேலும் மகிழ்ந்திடுவார்.
மழைத்துளி மண்ணில் வீழ்ந்ததும் மண்மணம் வீசிடும்;
மறைந்து வாழும் பூச்சிகளாம் உழவரின் நண்பர்கள்
வேதியல் மாற்றம் செய்ய வெளியே விரைந்திடுவர்;
விளைந்திடும் கோடைப்பயிர் ; விவசாயி மகிழ்ந்திடுவார்.
கோடைத் தூறலை வரவேற்போம் ; குடைகளை சுருக்குவோம்;
குளிர் தென்றலென எண்ணி மகிழ்வோம்; சிறிதாறுதல் பெறுவோம் ;
கூப்பிய கைகளுடன் இயற்கையை வணங்குவோம் ; வாழ்த்துவோம்;
கொண்டாடுவோம் இந்தத் தென்மேற்கு மழைத்தாயின் சிறுமகளை.