வீரிய எண்ணெய் வித்துக்களின்

விவரக் குறிப்புப் பட்டியலில்

ஓரிடம் சூரிய காந்திக்கும்

உள்ளதை நாமும் கண்டிடலாம்!

ஏரியின் குளத்தின் நீர்பாய்ச்ச

இயலாப் புஞ்சை நிலத்தினிலும்

ஏரினை ஓட்டி விதை போட்டு

எளிதாய்ப் பயிறும் செய்திடலாம்!

பேரிடர் விளைக்கும் கொழுப்புதனைப்

பெரிதும் விலக்கித் தயாரித்த

சூரிய காந்தி எண்ணெயினால்

சுவையாய்ச் சமைத்து உண்டிடலாம்!

நீரினில் பூக்கும் தாமரைபோல்

நிலத்தினில் பூக்கும் பூயிதுவும்

காரிருள் போக்க எழும் கதிராய்க்

கவனத்தை ஈர்க்கும் செண்டெனலாம்!

சூரியன் போகும் திசையினிலே

சுடர்முகம் காட்டித் திரும்புவதே

சூரிய காந்தி எனும் பெயரைச்

சூடிடக் காரணம் என்றிடலாம்!