கதைப்பாடல்: ஆனை, ஆனை!

குட்டிப் பாப்பா ஆசை கொண்டு
சுட்டித் தனமாய் அமரும் ஆனை!

கட்டிக் கரும்பாய் பேசும் பாப்பா
கட்டிப் பிடித்தே ஒட்டிய ஆனை!

அன்னம் போல அசையும் ஆனை
எண்ணம் போல ஏறிடக் குனியும்!

குழந்தைக்காகக் குனிந்தார் அப்பா!
அழகாய் முதுகில் அமர்ந்தாள் பாப்பா!

அட்டைக் கரி போல் நிறமில்லாமல்
சட்டை வேட்டி அணிந்த ஆனை!

கொம்பில்லாமல் கொஞ்சும் ஆனை
வம்பில்லாமல் நகரும் ஆனை!

மணியில்லாமல் கலகல வென்று
குனியும் ஆனை! குழந்தையும் சிரிக்கும்!

காட்டுக்குள்ளே போகப் பயந்து
வீட்டைச் சுற்றும் வேடிக்கை ஆனை!

சும்மா சும்மா தலையை ஆட்டும்!
கும்மாளந்தான் குழந்தைக் கெல்லாம்!