அங்கிள் ஆன்டெனா

கேள்வி:
கருப்பாக இருக்கும் தலைமுடி, வயது ஆக ஆக வெள்ளை நிறமாக மாறுவது ஏன், எப்படி?
பதில்:
இந்த முடி நரைத்தல் அல்லது வெள்ளையாதல் என்ற நிகழ்வு பற்றிப் பல காலங்களாக விஞ்ஞானிகள் ஆராய்ந்து வருகிறார்கள்.
சிலருக்கு வெகு சீக்கிரத்திலேயே முடி நரைக்க ஆரம்பித்து விடுகிறது. பலருக்கு அது வயதான பிறகு நேரிடுகிறது.
எப்படியானாலும் 30 வயதுக்கு மேல் ஆன உடன் ஆங்காங்கே சிற்சில முடிகள் என்று ஆரம்பித்து பத்து வருடங்களுக்கு ஒருமுறை இந்த எண்ணிக்கை கூடிக்கொண்டே செல்வதுதான் இயற்கையான ஒன்று.
மற்றபடி இளம் வயது நரை என்பது உடலில் ஏதோ ஒரு அமிலக் குறைவு அல்லது வேறு சில நோய்த்தொற்று ஆகியவற்றால் மட்டுமே நிகழ்கிறது.
அடிப்படையில் எல்லோருடைய தலைமுடியும் வெள்ளை நிறத்தால் ஆனதுதான் என்று நான் சொன்னால் உங்களுக்கு ஆச்சரியமாக இருக்கும். ஆனால் அதுதான் உண்மை.
இந்த வெள்ளை நிற முடிக்கு நிறத்தைக் கொடுப்பது மெலனின் (Melanin) என்ற திசுதான். இது நமது முடியின் மையப்பகுதியில் இருக்கிறது. இது சுரக்கும் அளவுக்கேற்றவாறுதான், நமது முடி கருப்பாகிறது. 
இதன் அளவு அதிகமாக இருந்தால் முடி கருகருவென்று கருப்பாக அமைந்து விடும். இதன் அளவுக்கேற்ப முடியின் நிறமும் மாறும். இதனால்தான் ஒவ்வொருவருக்கும் சாம்பல் நிற, பழுப்பு நிற, செந்நிற முடி என்று முடியின் நிறத்தில் மாற்றம் உண்டாகிறது. இதனால்தான் நாட்டுக்கு நாடு மக்களின் முடியின் நிறமும் வேறுபடுகிறது.
இந்த மெலனின் திசுவின் சுரப்பு வயது ஆக ஆகக் குறைந்து கொண்டே போவதினால்தான் நரை முடி அல்லது வெள்ளி முடி!
-ரொசிட்டா
அடுத்த வாரக் கேள்வி
பனிக்காலத்தில் பேசும் போது வாயிலிருந்து புகை வருவது ஏன்?
பி.கு.: இந்தப் பகுதிக்கு வாசகமணிகளும் கேள்விகளை அனுப்பலாம். இதுவரை இந்தப் பகுதியில் வெளிவராத கேள்விகளாக இருந்தால், நிச்சயம் நல்ல பதில் கிடைக்கும்.