பந்து விளையாடு பட்டம் விளையாடு!
பம்பரம் சுற்று தம்பி!
வந்து விளையாடு கண்ணா மூச்சிக்கு
வட்டம் உருவாக்கு தம்பி!
கூடி விளையாடு குழந்தை பலரோடு
கோலி விளையாடு தம்பி!
பாடி விளையாடு கபடி விளையாட்டில்
ஓடி விளையாடு தம்பி!
சேர்ந்து விளையாடு சிரித்து விளையாடு
சிறிய மணல் வீடு கட்டு!
சோர்வு வருமாயின் கொஞ்சம் இளைப்பாறு
களைப்பு வெளியேறும் தம்பி!
பொழியும் மழைநேரம் தாளில் உருவாகும்
கப்பல் விடவேண்டும் தம்பி!
ஒளிந்து விளையாடும் கள்ளன் போலீசில்
ஒண்ணு ரெண்டு நீ சொல்லு!
தாண்டி விளையாடு தாவி விளையாடு
சறுக்கி விளையாடு தம்பி!
கூட்டுப் பொரியலுடன் மண்ணை உணவாக்கு
மண்ணும் மணமாகும் உன்னால்!
பொம்மை மடிமீதில் வைத்து விளையாடு
உண்மை உறவோடு கொஞ்சு
நம்மை வலுவாக்கும் நன்மை விளைவாக்கும்
நாளும் விளையாடி மகிழ்வாய்!