"யாவரும் நலம்', "தீராத விளையாட்டுப்பிள்ளை' படங்களில் நடித்த பாலிவுட் நடிகை  நீது சந்திரா, "யுத்தம் செய்' படத்தில் ஒரு பாடலுக்கு நடனம் ஆடுகிறார். மிஷ்கின் இயக்கும் இந்தப் படத்தில் சேரன் கதாநாயகனாக நடிக்கிறார்.

தமிழிலும் ஹிந்தியிலும் கதாநாயகியாக நடித்து வரும் வேளையில் ஒரு பாடலுக்கு நடனமாட என்ன காரணம்? என்று கேட்டால்...

""இந்தப் பாடலை என்னால்தான் அழகூட்ட முடியும் என இயக்குநர் நம்பியதுதான்  காரணம். ஒரு பாடலுக்கு ஆடுவது என்பது எல்லோராலும் முடியாது. அது சாதாரண விஷயமும் கிடையாது. ஒரு படத்தின் வியாபார வெற்றியை ஒரேயொரு பாடல்கூட தீர்மானிக்க முடியும்.

அது நான் நடனமாடும் பாடலாகவும் இருக்கலாம். நான் பிரபலமாக இருப்பதால்தானே அழைக்கிறார்கள். இதுவரை எத்தனையோ பாடல்களில்  நடித்திருந்தாலும் இந்தப் பாடல் எனக்கும் ரசிகர்களுக்கும் புதுமையான அனுபவமாக இருக்கும். ஏனென்றால் இந்த ஒரு பாடலில், முழுக்க முழுக்க நான் சேலை கட்டி மட்டுமே நடனமாடுகிறேன்'' என்கிறார்.