40 ஆயிரம் கி.மீ. பயணம்

இதுவரை தமிழ் சினிமாவில் பல சாலைககளை மையமாக கொண்ட படங்கள் வந்திருந்தாலும் அவை எதுவும் தமிழகத்தை மையப்படுத்தி வெளியானது இல்லை. ஆனால் முதன்முறையாக அந்தக்குறையை போக்கும் விதமாக உருவாகியுள்ள படம்  "துரிதம்'.  கதையின் நம்பகத்தன்மைக்காக தமிழ்நாட்டில், அதுவும் கதை நிகழும் சம்பந்தப்பட்ட ஊர்களுக்கே பயணப்பட்டு மொத்த படப்பிடிப்பையும் நடத்தியுள்ளனர். கிட்டத்தட்ட 65 நாட்கள் இந்தப்படத்தின் படப்பிடிப்பு நடைபெற்றுள்ளது.

இதற்காக தமிழகத்துக்குள்ளேயே 40 ஆயிரம் கிலோ மீட்டர்கள் பயணித்து சாலைகளில் மட்டுமே பெரும்பாலான காட்சிகளின் படப்பிடிப்பை நடத்தியுள்ளனர்.  எல்லோருக்குமே தாங்கள் செய்யும் விஷயங்கள் அவர்கள் கண்ணோட்டத்தில் சரி என்பது போலத்தான் தெரியும்.. ஆனால்,  அடுத்தவர்கள் பார்வையில் அது தவறாக தெரிய வாய்ப்பு உண்டு. இந்த கருத்தை மையப்படுத்தி திரைக்கதை அமைக்கப்பட்டுள்ளது. சீனிவாசன் எழுதி இயக்குகிறார். ஜெகன்,  "மிஸ் சவுத் இந்தியா' பட்டம் வென்ற ஈடன், ஏ.வெங்கடேஷ்,  பாலசரவணன், பூ ராமு உள்ளிட்டோர் நடிக்கின்றனர்.