சீனாவில் அடுத்தடுத்துநிலநடுக்கம்: மூவா் பலி

சீனாவின் யுனான் மாகாணத்தில் வெள்ளிக்கிழமை ஏற்பட்ட தொடா் நிலநடுக்கத்தில் மூவா் உயிரிழந்ததாகவும், 27 போ் காயமடைந்ததாகவும் அதிகாரிகள் தெரிவித்துள்ளனா்.

தலி பய் தன்னாட்சி மாகாணத்தில் 12 மாவட்டங்களிலும், யாங்பி தன்னாட்சிப் பகுதியிலும் இந்த நிலநடுக்கம் உணரப்பட்டது. யாங்பி-யில் உள்ளூா் நேரப்படி இரவு 9 முதல் 11 மணிக்குள் நான்கு முறை நிலநடுக்கம் ஏற்பட்டதாகவும், ரிக்டா் அளவுகோலில் 5.0 -ஆக பதிவானதாகவும் சீன நிலநடுக்க நெட்வொா்க் மையம் தெரிவித்துள்ளது. இந்த நிலநடுக்கத்தால் யாங்பி பகுதியில் இருவரும், யோங்பிங் பகுதியில் ஒருவரும் உயிரிழந்தனா்; 27 போ் காயமடைந்தனா்; 20,192 குடியிருப்புகள் சேதமடைந்ததாக அரசின் செய்தி நிறுவனம் தெரிவித்துள்ளது.

அதேவேளையில் குயிங்காய் மாகாணத்தில் சனிக்கிழமை ரிக்டா் அளவுகோலில் 7.4-ஆக பதிவான நிலநடுக்கத்தால் எந்தப் பாதிப்பும் ஏற்படவில்லை. இருப்பினும் நிலநடுக்கம் ஏற்பட்ட பகுதிகளில் மீட்புப் படையினா் அனுப்பிவைக்கப்பட்டுள்ளனா்.