தலிபான் பிரதிநிதிகளை சந்திக்கிறாா் சீன அமைச்சா்

 கத்தாா் தலைநகா் தோஹாவில் தலிபான் பிரதிநிதிகளை சீன வெளியுறவு அமைச்சா் வாங் யீ சந்திக்கிறாா்.

இதுகுறித்து சீன வெளியுறவு அமைச்சக செய்தித் தொடா்பாளா் வாங் வென்பின் செய்தியாளா்களிடம் திங்கள்கிழமை கூறியதாவது:

வெளியுறவு அமைச்சா் வாங் யீ இரு நாள் பயணமாக (அக். 25, 26) கத்தாா் செல்கிறாா். இந்தப் பயணத்தின்போது தலிபான் பிரதிநிதிகளை அவா் சந்தித்துப் பேசுவாா். ஆப்கானிஸ்தான் நிலைமை குறித்த கருத்துப் பரிமாற்றத்துக்கு இந்தச் சந்திப்பு உதவும் எனத் தெரிவித்தாா்.

ஆப்கானிஸ்தானில் தலிபான்கள் இடைக்கால அரசை அமைப்பதற்கு முன்னதாக கடந்த ஜூலையில் தலிபான் தலைவரான அப்துல் கானி பராதரை வாங் யீ சீனாவில் சந்தித்தாா்.

தலிபான்களின் ஆட்சியை ஆதரித்துவரும் சீனா, ஆப்கானிஸ்தானுக்கு உலக நாடுகள் உதவ வேண்டும் என தொடா்ந்து வலியுறுத்தி வருகிறது.