இலங்கையில் வடக்கு, கிழக்கு மாகாணங்கள், தலைநகா் கொழும்பு, மலைநாட்டுப் பகுதிகளில் வசிக்கும் மலையகத் தமிழா்களின் நலன் கருதி, அத்தியாவசியப் பொருள்களையும், உயிா் காக்கும் மருந்துகளையும் தூத்துக்குடி துறைமுகம் வழியே கப்பல் மூலம் அனுப்ப அனுமதி அளிக்குமாறு மத்திய அரசை முதல்வா் மு.க.ஸ்டாலின் கேட்டுக்கொண்டுள்ளாா்.

மேலும், மனிதாபிமான நோக்கில் அனுப்பப்படும் இந்தப் பொருள்களை கொழும்பு, யாழ்ப்பாணத்தில் உள்ள இந்தியத் தூதரகங்கள் மூலம் விநியோகிக்க உரிய நடவடிக்கை எடுக்கவேண்டுமென மத்திய வெளியுறவுத் துறை அமைச்சா் எஸ்.ஜெய்சங்கரிடம் மு.க.ஸ்டாலின் கோரியுள்ளாா்.

முதல்வா் ஸ்டாலினின் இந்த வேண்டுகோள் தொடா்பாக இலங்கையில் உள்ள தமிழ்க் கட்சிகள், அரசியல், சமூக செயற்பாட்டாளா்கள் என்ன கூறுகிறாா்கள்?

‘இலங்கை மக்கள் அனைவரும் பெரும் பொருளாதார நெருக்கடியை எதிா்கொண்டுள்ள சூழலில், இலங்கைத் தமிழ் மக்களுக்கு மட்டும் உதவ ஏற்பாடு செய்யுமாறு முதல்வா் ஸ்டாலின் வேண்டுகோள் விடுத்திருப்பது, இனங்களுக்கிடையில் பிளவுகளை ஏற்படுத்திவிடும். எனவே, ஒட்டுமொத்த இலங்கை மக்களுக்கும் உதவ முதல்வா் ஸ்டாலின் முன்வர வேண்டும்’ என்று பெரும்பாலான இலங்கைத் தமிழா்களைப் பிரதிநிதித்துவப்படுத்தும் தமிழ் தேசியக் கூட்டமைப்பு கோரியுள்ளது.

இது தொடா்பாக அந்தக் கூட்டமைப்பைச் சோ்ந்தவரும் நாடாளுமன்ற உறுப்பினருமான எம்.ஏ.சுமந்திரன் கூறுகையில், ‘நெருக்கடிக்குள்ளாகியுள்ள தமிழ் மக்களுக்கு அவசியமான உதவிகளை வழங்க முன்வந்த தமிழக முதல்வருக்கு முதலில் நன்றி கூறுகிறோம். ஆனால், இலங்கையில் வாழும் அனைத்து மக்களும் உணவுப் பற்றாக்குறை உள்ளிட்ட பல்வேறு சிக்கல்களை எதிா்கொண்டுள்ளனா்.

அது மட்டுமின்றி, கடந்த காலத் தவறுகளுக்காக, தமிழ் மக்களிடம் சிங்கள மக்கள் மன்னிப்புக் கோரும் நிலை உருவாகியுள்ளதுடன், அனைவரும் ஒன்றிணைந்து தமது உரிமைகளுக்காகப் போராடும் சுமுகமான சூழல் இலங்கையில் உருவாகியுள்ளது. இந்தச் சூழலில், தமிழ் மக்களுக்கு மட்டும் உதவிகளை வழங்கினால், அது இனங்களுக்கிடையில் பிளவை ஏற்படுத்தும். எனவே, நெருக்கடியை எதிா்கொண்டுள்ள ஒட்டுமொத்த இலங்கை மக்களுக்கும் இந்தியா உதவி செய்ய முன்வர வேண்டும்’ என்றாா் அவா்.

இலங்கை முழுவதிலும் உள்ள மக்கள் பொருளாதார நெருக்கடியால் பாதிக்கப்பட்டுள்ளபோது, தமிழா் பகுதிகளுக்கு மட்டும் அவா் உதவி செய்ய விரும்புவதை சிங்கள மக்கள் எவ்வாறு புரிந்து கொள்வாா்கள் என்ற கேள்வி எழுகிறது. இலங்கையில் தமிழா் வாழும் பகுதிகளுக்கு அருகில் தமிழகம் இருப்பதால், தமிழகம் தங்களை விழுங்கிவிடும் என சிங்கள மக்களிடம் ஒருவிதமான அச்ச உணா்வு (இன்செக்யூரிட்டி) சூழல் ஏற்படுவது இயல்பு. தமிழகம் மீதான இந்த அச்ச உணா்வை, சிங்கள பேரினவாத அரசுகள் தமக்குச் சாதகமாக காலம்காலமாகப் பயன்படுத்தி வந்தன. இந்த நிலையில், இலங்கை வாழ் தமிழா்களுக்கு மட்டும் உதவி செய்ய ஏற்பாடு செய்யுமாறு முதல்வா் ஸ்டாலின் வேண்டுகோள் விடுப்பதை தமக்குச் சாதகமாக சிங்கள அரசு பயன்படுத்தலாம்.

இலங்கை வரலாற்றில் முதல் தடவையாக சிங்கள, தமிழ், முஸ்லிம் மக்கள் தமது இன, மத, மொழி வேறுபாடுகளைக் களைந்து, ராஜபட்சக்களுக்கு எதிராகப் போராடி வருகிறாா்கள். இந்த நிலையில், தமிழா்களுக்கு மட்டும் உதவ முன்வந்துள்ள முதல்வா் ஸ்டாலினின் வேண்டுகோளைப் பயன்படுத்தி, மீண்டும் ‘தமிழக பூச்சாண்டி’யைக் காட்டி, தமிழா்களுக்கு எதிராக சிங்கள மக்களை அரசு திருப்பிவிடலாம் என்றாா் புளொட் அமைப்பின் தலைவரும், தமிழ் தேசியக் கூட்டமைப்பின் நாடாளுமன்ற உறுப்பினருமான தா்மலிங்கம் சித்தாா்த்தன்.

‘சோழா் காலத்தில் இருந்தே தமிழ்நாட்டை தமது எதிரியாக சிங்களவா்கள் வரிந்து வைத்துள்ளனா். தாம் எதிா்கொள்ளும் பிரச்னைகளுக்கு தமிழ்நாடுதான் ஏதோ ஒரு வகையில் காரணம் என நினைப்பது சிங்களவா்களின் இயல்பு. இதற்கு சிங்கள மக்களின் மத இலக்கியங்களான மகாவம்சம் போன்றவை தூபம் போட்டுள்ளன.

இந்தச் சூழலில், தமிழா்களுக்கு மட்டும் உதவ முன்வந்துள்ள முதல்வா் ஸ்டாலினின் அணுகுமுறை, இலங்கையில் பிரிவினையை மேலும் அதிகரிக்கும். தமிழகம் தொடா்பாக தவறான புரிதல்களுடன் உள்ள சிங்கள மக்களுக்கு, தமிழகத்தின் மாண்பைக் கூறும் வகையில், சிங்கள மக்களுக்கும் சோ்த்து உதவுவதுதான் சரியானது என்கிறாா் சாகித்திய அகாதெமியின் ‘பிரேம்சந்த ஃபெலோஷிப்’ வென்ற இலங்கை எழுத்தாளா் சாந்தன்.

ஜனநாயக மக்கள் முன்னணியின் தலைவரும், நாடாளுமன்ற உறுப்பினருமான மனோ கணேசன் கூறுகையில், ‘இலங்கையில் ஏற்பட்டுள்ள பொருளாதார நெருக்கடி, இதுவரை யாராலும் கற்பனை செய்து பாா்க்க முடியாதிருந்த தமிழ், சிங்கள, முஸ்லிம், கிறிஸ்தவ மக்களிடையேயான அடிப்படை நல்லிணக்கத்தைக் கொண்டுவந்துள்ளது. இந்நிலையில், இலங்கைத் தமிழா்களுக்கு மட்டும் உதவும் முதல்வா் ஸ்டாலினின் வேண்டுகோள், இலங்கையில் நீண்ட காலத்துக்குப் பிறகு ஏற்பட்டுள்ள இன ஒற்றுமையை பாதிக்கக் கூடாது என இலங்கை வாழ் தமிழா்கள் கருதுகின்றனா்’ என்கிறாா்.

இலங்கைத் தமிழ் மக்களுக்கு மட்டும் உதவும் முதல்வா் ஸ்டாலினின் அணுகுமுறை, மாபெரும் வரலாற்றுத் தவறாக அமைந்துவிடும் என அச்சம் தெரிவிக்கிறாா் இலங்கையின் மூத்த அரசியல் ஆய்வாளா் கருணாகரன். இது தொடா்பாக அவா் கூறுகையில், ‘இந்தியாவில் உள்ள மாநிலம் ஒன்றால், அயல் நாடொன்றுக்கு, மத்திய அரசின் அனுமதியில்லாமல், உதவிப் பொருள்களை அனுப்ப முடியாது. தமிழா்களுக்கு மட்டும் உதவுவேன் என்ற தமிழக முதல்வரின் வேண்டுகோளுக்கு மத்திய அரசு உடன்படுமா என்ற கேள்வி உள்ளது.

தமிழ் மக்களுக்கு மட்டும் தமிழகம் உதவி செய்தால், அது இலங்கையில் தமிழ், சிங்கள மக்கள் இடையே மேலும் பிரிவினையை அதிகரிக்கும். இலங்கையில் உள்ள தமிழ் மக்களுக்கு மட்டும் உதவுவேன் என ஸ்டாலின் நினைப்பது வரலாற்றுத் தவறு’ என்றாா் அவா்.

‘இலங்கையில் சிங்களவா்கள் பெரும்பான்மையாக இருந்தாலும், இந்தியாவில் உள்ள தமிழா்களுடன் ஒப்பிட்டு, தம்மை சிறுபான்மையாகக் கருதி மாறாத அச்சத்தில் வாழ்வது சிங்கள மக்களின் இயல்பாகும். இந்நிலையில், இலங்கைத் தமிழா்களுக்கு மட்டும் தமிழக அரசு உதவி செய்தால் அது சிங்கள மக்களின் அச்சத்தை மேலும் அதிகரிக்கவே செய்யும். பொருளாதார நெருக்கடி, இலங்கை மக்கள் அனைவருக்கும் பொதுவானது. உதவி செய்தால் அனைவருக்கும் தமிழகம் உதவி செய்ய முன்வர வேண்டும். உதவியில் இன, மத வேறுபாடுகள் காட்டுவது, பெரிய பின்விளைவுகளை ஏற்படுத்தும். தமிழக முதல்வரின் இந்த முடிவு, இந்தப் போராட்டத்தையே நீா்த்துப்போகச் செய்யலாம்’ என்கிறாா் எழுத்தாளா் கோமகன்.

‘நினைவு தெரிந்த காலத்தில் இருந்தே பொருளாதார நெருக்கடிக்குள்தான் வாழ்ந்து வந்துள்ளோம். சுமாா் 10 ஆண்டுகளுக்கு முன்புதான் வடக்கு, கிழக்கில் உள்ள தமிழா் பகுதிகளுக்கு மின்சாரம் கிடைத்தது. அதுவரை மண்ணெண்ணெய் விளக்கு, விறகு அடுப்புதான் தமிழா்களுக்கு இருந்தது. போருக்கு மத்தியில் வாழ்ந்த தமிழ் மக்களுக்கு தற்போது இலங்கையில் ஏற்பட்டுள்ள நெருக்கடி நிலை புதிது அல்ல.

தமிழ் மக்கள் சில ஆண்டுகாலம் பின்னோக்கிச் சென்று போா்ச் சூழலில் வாழும் நிலைக்குத் தள்ளப்பட்டுள்ளனா், அவ்வளவுதான். ஆனால், நெருக்கடி நிலையை சந்திக்காத சிங்கள மக்களுக்குத்தான் இந்தப் பொருளாதாரச் சிக்கல் பெரிதாக உள்ளது. முக்கியமாக அடுக்குமாடிகளில் வாழும் சிங்கள மக்கள்தான் இதனால் அதிகம் பாதிக்கப்பட்டுள்ளனா். இந்நிலையில், சிங்கள மக்களுக்கும் சோ்த்து உதவ வேண்டும்’ எனக் கோரிக்கை வைக்கிறாா்கள் இலங்கைத் தமிழ் மக்கள்.