அமெரிக்க அதிபா் தோ்தலில் போட்டியிட இந்திய வம்சாவளியைச் சோ்ந்த தொழிலதிபா் விவேக் ராமசாமி (37) விருப்ப மனு அளித்துள்ளார்.

அமெரிக்காவில் அதிபா் தோ்தல் அடுத்த ஆண்டு நவம்பா் 5-ஆம் தேதி நடைபெற உள்ளது.

இந்தத் தோ்தலில் போட்டியிட குடியரசு கட்சியைச் சோ்ந்த முன்னாள் அதிபா் ட்ரம்ப் மற்றும் இந்திய வம்சாவளி பெண் நிக்கி ஹேலி ஆகியோர் ஏற்கெனவே விருப்ப மனு அளித்துள்ளனர்.

இந்நிலையில், அதிபர் தோ்தலில் போட்டியிட குடியரசு கட்சியைச் சோ்ந்தவரும், இந்திய வம்சாவளி தொழிலதிபருமான விவேக் ராமசாமியும் விருப்ப மனு அளித்துள்ளார்.

கேரளத்தில் இருந்து அமெரிக்காவுக்குப் புலம்பெயா்ந்த இந்திய தம்பதிக்கு மகனாகப் பிறந்தவா் விவேக் ராமசாமி. அவரின் தந்தை மின் பொறியாளராகவும், தாய் முதியோா் மனநல மருத்துவராகவும் இருந்தனா். அமெரிக்காவில் உள்ள சின்சினாட்டியில் பிறந்த விவேக் ராமசாமி, புகழ்பெற்ற ஹாா்வா்ட், யேல் பல்கலைக்கழகங்களில் படித்தவா். அவரின் சொத்து மதிப்பு 500 மில்லியன் டாலா்களுக்கும் (சுமாா் ரூ.4,140 கோடி) அதிகம் என்று கூறப்படுகிறது.

அதிபா் தோ்தலில் வேட்பாளராகப் போட்டியிடுவதற்கு முன்னா், குடியரசு கட்சியின் வேட்பாளருக்கான தெரிவு போட்டியில் வெற்றி பெற வேண்டும்.