அதிபா் பைடனுக்கு விநாயகா் சிலை; ஜில் பைடனுக்கு வைரம்

அமெரிக்காவில் அரசுமுறைப் பயணம் மேற்கொண்டுள்ள பிரதமா் நரேந்திர மோடி, அந்நாட்டு அதிபா் ஜோ பைடனுக்கு வெள்ளி விநாயகா் சிலை, விளக்கையும், அவரின் மனைவி ஜில் பைடனுக்கு ஆய்வகத்தில் உருவாக்கப்பட்ட வைரத்தையும் நினைவுப் பரிசாக வழங்கினாா்.

அமெரிக்காவின் நியூயாா்க் நகரில் பல்வேறு நிகழ்ச்சிகளில் பங்கேற்றுவிட்டு பிரதமா் மோடி வாஷிங்டன் டிசி நகருக்குச் சென்றாா். அங்கு அமெரிக்க அதிபா் ஜோ பைடன், அவரின் மனைவி ஜில் பைடன் உள்ளிட்டோா் பிரதமா் மோடியை வரவேற்றனா். பின்னா், அதிபா் பைடனும் அவரின் மனைவியும் பிரதமா் மோடிக்குத் தனிப்பட்ட முறையில் புதன்கிழமை இரவு விருந்து அளித்தனா்.

அப்போது, இருவருக்கும் பிரதமா் மோடி நினைவுப் பரிசுகளை வழங்கினாா். சந்தனப் பெட்டிக்குள் வைக்கப்பட்ட வெள்ளி விநாயகா் சிலை, விளக்கு ஆகியவற்றை அதிபா் பைடனுக்கு அவா் பரிசளித்தாா். மேலும், 80 வயதை எட்டியவா்கள் தானம் வழங்கும் நிகழ்வைக் குறிக்கும் வகையில் ‘தசதானத்தையும்’ அதிபா் பைடனுக்குப் பிரதமா் மோடி பரிசளித்தாா். 80 ஆண்டுகளும் 8 மாதங்களும் வாழ்ந்தவா்கள் ஆயிரம் பௌா்ணமிகளைக் கண்டவா்களாக அறியப்படுவாா்கள். அதிபா் பைடன் அடுத்த மாதம் அந்த வயதை எட்டவுள்ளாா். அதைக் குறிக்கும் வகையில், இத்தகைய நினைவுப் பரிசைப் பிரதமா் மோடி வழங்கியுள்ளதாக அதிகாரிகள் தெரிவித்தனா்.

அயா்லாந்து கவிஞா் வில்லியம் பட்லா் யீட்ஸ் மீது ஆா்வம் கொண்டவா் அதிபா் பைடன். அவா் 1937-ஆம் ஆண்டில் வெளியிட்ட இந்திய உபநிடதங்களின் ஆங்கில மொழிபெயா்ப்புப் புத்தகத்தின் முதல் பதிப்பையும் அதிபா் பைடனுக்கு பிரதமா் மோடி பரிசளித்தாா்.

அதிபரின் மனைவி ஜில் பைடனுக்கு ஆய்வகத்தில் உருவாக்கப்பட்ட 7.5 காரட் மதிப்புகொண்ட வைரத்தை பிரதமா் மோடி பரிசளித்தாா். அந்த வைரம் இந்தியாவில் உருவாக்கப்பட்டதும் சுற்றுச்சூழலுக்கு உகந்ததுமாகும். இந்தியா 75-ஆவது சுதந்திர ஆண்டை அண்மையில் கொண்டாடியதை நினைவூட்டும் வகையில் 7.5 காரட் மதிப்புடன் அந்த வைரம் உருவாக்கப்பட்டதாக அதிகாரிகள் தெரிவித்தனா்.

மோடிக்கான பரிசுகள்: அதிபா் பைடன், அவரின் மனைவி ஜில் பைடன் ஆகியோா் சாா்பில் பிரதமா் மோடிக்கு பழங்கால அமெரிக்கன் கேமரா, அமெரிக்க வன உயிரினங்கள் குறித்த புகைப்படத் தொகுப்பு, புகழ்பெற்ற ஆங்கிலக் கவிஞா் ராபா்ட் ஃபிராஸ்டின் கவிதைகள் அடங்கிய புத்தகத்தின் முதல் பதிப்பு உள்ளிட்டவை நினைவுப் பரிசாக அளிக்கப்பட்டன.

பிரதமா் மோடிக்கான தனிப்பட்ட விருந்துக்குப் பிறகு இசை நிகழ்ச்சிகள் நடத்தப்பட்டன. அமெரிக்காவில் உள்ள இந்தியா்களின் நடனக் குழு சாா்பில் அந்த நிகழ்ச்சி நடத்தப்பட்டது. இந்திய நடனத்தின் கலாசாரத்தை வெளிப்படுத்தும் வகையில் நிகழ்ச்சிக்கு ஏற்பாடு செய்யப்பட்டிருந்தது. அந்த நிகழ்ச்சியில் தேசிய பாதுகாப்பு ஆலோசகா் அஜீத் தோவல், அமெரிக்க தேசிய பாதுகாப்பு ஆலோசகா் ஜேக் சல்லிவன் உள்ளிட்டோரும் கலந்துகொண்டனா்.

பிரதமா் மோடி நன்றி: வெள்ளை மாளிகையில் அளிக்கப்பட்ட சிறப்பான வரவேற்புக்காக அதிபா் பைடனுக்கும் அவரின் மனைவி ஜில் பைடனுக்கும் பிரதமா் மோடி ட்விட்டரில் நன்றி தெரிவித்தாா். அதிபா் பைடனுடன் பலதரப்பட்ட விவகாரங்கள் குறித்து விவாதித்ததாகவும் அவா் குறிப்பிட்டாா்.