அமெரிக்காவின் புதிய அதிபரை தோ்ந்தெடுப்பதற்கான வாக்குப் பதிவு செவ்வாய்க்கிழமை விறுவிறுப்பாக நடைபெற்றது. புதிய அதிபா் டொனால்ட் டிரம்பா, கமலா ஹாரிஸா என்பது விரைவில் தெரியவரும்.

அமெரிக்க அதிபா் தோ்தல் 4 ஆண்டுகளுக்கு ஒருமுறை நடைபெறுகிறது. நிகழாண்டு அந்தத் தோ்தலில் ஜனநாயக கட்சி வேட்பாளராக முதலில் அந்நாட்டின் தற்போதைய அதிபா் ஜோ பைடன் அறிவிக்கப்பட்டாா். குடியரசு கட்சி வேட்பாளராக அந்நாட்டின் முன்னாள் அதிபா் டொனால்ட் டிரம்ப் போட்டியிடுகிறாா்.

எனினும் வயது முதிா்வு காரணமாக பைடனின் செயல்திறனில் சுணக்கம் ஏற்பட்டதால், தோ்தலையொட்டி டிரம்ப் உடனான நேரடி விவாதத்தில் பைடன் மிகவும் தடுமாறியது விமா்சனங்களுக்கு வழிவகுத்தது. இதன் காரணமாக அதிபா் தோ்தல் போட்டியில் இருந்து பைடன் விலக வேண்டும் என்று அவரின் சொந்தக் கட்சியினரே அழுத்தம் அளித்தனா். இதையடுத்து, அதிபா் தோ்தல் போட்டியில் இருந்து பைடன் விலகினாா். இதைத் தொடா்ந்து, ஜனநாயக கட்சி வேட்பாளராக அந்நாட்டின் தற்போதைய துணை அதிபா் கமலா ஹாரிஸ் அறிவிக்கப்பட்டாா்.

அந்நாட்டின் புதிய அதிபரை தோ்ந்தெடுக்க வாக்குப் பதிவு நாளுக்கு முன்பாகவே வெவ்வேறு நாள்களில் முன்கூட்டியே வாக்களிக்கும் வசதி உள்ளது. இந்த நடைமுறையின்படி வாக்குப் பதிவு மையங்களில் நேரடியாகவும், தபால் வாக்குகளையும் வாக்காளா்கள் செலுத்துவது வழக்கம். இதன்மூலம், தோ்தல் நாளன்று மோசமான வானிலை, வாக்களிக்க நீண்ட வரிசையில் காத்திருத்தல், வாக்குப் பதிவு நாளன்று ஏற்படக்கூடிய எதிா்பாராத சிக்கல்கள் உள்ளிட்டவற்றை வாக்காளா்கள் தவிா்க்க முடியும். இதன்படி முன்னெப்போதும் இல்லாத வகையில், 8.2 கோடிக்கும் மேற்பட்டவா்கள் முன்கூட்டியே வாக்களித்தனா்.

சமமான போட்டி: இதைத் தொடா்ந்து, அதிகாரபூா்வ வாக்குப் பதிவு நாளான செவ்வாய்க்கிழமை கோடிக்கணக்கான வாக்காளா்கள் வாக்குப் பதிவு மையத்துக்கு வந்து மிகுந்த ஆா்வத்துடன் வாக்களித்தனா். தோ்தலில் வெற்றி பெறுபவா் யாா் என்பதில் கமலாவுக்கும் டிரம்புக்கும் இடையே சமமான போட்டி நிலவுவதாக அமெரிக்க ஊடகங்களின் கருத்துக் கணிப்புகள் தெரிவித்துள்ளன. எனினும் வெற்றி பெறுவதற்கு கமலா ஹாரிஸுக்கு சற்று கூடுதல் வாய்ப்புள்ளதாக சில ஊடகங்களின் கருத்துக் கணிப்புகளில் தெரிவிக்கப்பட்டுள்ளது. இந்தத் தோ்தலில் வெற்றி பெறுவதற்கு அரிசோனா, ஜாா்ஜியா, மிஷிகன், நெவாடா, வடக்கு கரோலினா, விஸ்கான்சின் ஆகியவை முக்கிய மாகாணங்களாக உள்ளன.

முதல் கருப்பின பெண்: தோ்தலில் கமலா ஹாரிஸ் வெற்றி பெற்றால், தெற்காசியாவை சோ்ந்த முதல் கருப்பின அமெரிக்க அதிபா் என்ற வரலாற்றை அவா் படைப்பாா்.

பொதுமக்கள் நேரடியாகத் தோ்வு செய்வதில்லை: அமெரிக்க அதிபா் தோ்தலைப் பொருத்தவரை, அந்நாட்டு அதிபரை வாக்காளா்களாகிய பொதுமக்கள் நேரடியாகத் தோ்ந்தெடுப்பதில்லை. தங்கள் விருப்பத்துக்குரிய வேட்பாளருக்கு பொதுமக்கள் வாக்களித்தாலும், அந்த வாக்குகள் ஒவ்வொரு மாகாணத்திலும் சம்பந்தப்பட்ட வேட்பாளரின் கட்சி நியமிக்கும் பிரதிநிதிக்கே செல்லும்.

அந்த வகையில், பொதுமக்களின் வாக்குகள் வெற்றி பெறுபவா் யாா் என்பதை நேரடியாகத் தீா்மானிக்காது. வேட்பாளரின் கட்சி நியமிக்கும் பிரதிநிதிகளும் வேட்பாளருக்கு வாக்களிக்க வேண்டும்.

அமெரிக்காவில் மொத்தம் 50 மாகாணங்கள் உள்ள நிலையில், அந்நாட்டு நாடாளுமன்றத்தில் அந்த மாகாணங்கள் சாா்பாக உள்ள எம்.பி.க்களின் எண்ணிக்கைக்கு ஏற்ப பிரதிநிதிகளின் எண்ணிக்கை முடிவு செய்யப்படுகிறது.

இதன்படி, அமெரிக்கா நாடாளுமன்றத்தில் மொத்தம் 535 எம்.பி.க்கள் உள்ளனா். அவா்களில் 435 போ் கீழவையைச் சோ்ந்தவா்கள். 100 போ் மேலவையைச் சோ்ந்தவா்கள். இந்த எம்.பி.க்கள் எண்ணிக்கைக்கு ஏற்ப 535 பிரதிநிதிகள், கொலம்பியா மாவட்டம் (இந்த மாவட்டத்துக்கு கீழவையில் பிரதிநிதிகள் இல்லை) சாா்பாக தனியாக 3 பிரதிநிதிகள் என 50 மாகாணங்களில் மொத்தம் 538 பிரதிநிதிகள் நியமிக்கப்படுவா்.

50.1% வாக்குகளை பெற்றால்...: பொதுவாக அனைத்து மாகாணங்களிலும் பொதுமக்களின் பெரும்பான்மை வாக்குகளைப் பெறும் வேட்பாளருக்கு அந்த மாகாணங்களில் உள்ள அனைத்துப் பிரதிநிதிகள் வாக்குகளும் வழங்கப்படும்.

உதாரணத்துக்கு டெக்சாஸில் ஒரு வேட்பாளா் 50.1 சதவீத வாக்குகளைப் பெற்றால், அந்த மாகாணத்துக்கு ஒதுக்கப்படும் 40 பிரதிநிதிகள் வாக்குகளும் அந்த வேட்பாளருக்கே கிடைக்கும்.

270 பிரதிநிதிகள் வாக்குகள் தேவை: பொதுமக்கள் வாக்களித்த பின்னா், பிரதிநிதிகளும் வேட்பாளா்களுக்கு வாக்களிப்பா். மொத்தம் 538 பிரதிநிதிகளில் பாதிக்கும் மேற்பட்டவா்கள் (270) எந்த வேட்பாளருக்கு வாக்களிக்கிறாா்களோ, அந்த வேட்பாளரே அதிபா் தோ்தலில் வெற்றியாளராக அறிவிக்கப்படுவாா்.

டிசம்பரில் பிரதிநிதிகள் வாக்குப் பதிவு: பெரும்பாலான நேரங்களில் வாக்குப் பதிவு முடிந்தவுடன் பொதுமக்களின் வாக்குகள் எண்ணப்பட்டு வெற்றியாளா் யாா் என்பது தெரியவந்துவிடும். இருப்பினும் டிசம்பா் மத்தியில்தான் பிரதிநிதிகளின் வாக்குப் பதிவு நடைபெறும். அங்குள்ள சில மாகாணங்களில், ஒரு வேட்பாளரின் கட்சி சாா்பாக நியமிக்கப்படும் பிரதிநிதி மாற்றுக் கட்சி வேட்பாளருக்கும் வாக்களிக்க முடியும். அதுபோன்ற நிகழ்வு கடந்த 2016-ஆம் ஆண்டு அதிபா் தோ்தலில் நடைபெற்றது. எனினும் பெரும்பாலான நேரங்களில், பொதுமக்கள் எந்த வேட்பாளருக்கு அதிக அளவில் வாக்களிக்கிறாா்களோ, அந்த வேட்பாளருக்கே பிரதிநிதிகளும் வாக்களித்து வருகின்றனா்.

ஜன.20-இல் பதவியேற்பு: அடுத்த ஆண்டு ஜனவரியில் பிரதிநிதிகள் வாக்குகளை அமெரிக்க நாடாளுமன்றம் எண்ணும். அதன் பின்னா் வெற்றியாளா் அறிவிக்கப்படுவாா்.

ஒருவேளை எந்தவொரு அதிபா் வேட்பாளரும் 270 பிரதிநிதிகள் வாக்குகளைப் பெறாவிட்டால், அந்நாட்டின் 12-ஆவது அரசமைப்புச் சட்டத்திருத்தத்தின்படி அதிபா் தோ்தல் முடிவை நாடாளுமன்றக் கீழவை முடிவு செய்யும். தேவைப்பட்டால் பிரதிநிதிகளின் வாக்குகளில் பெரும்பான்மை வாக்குகளைப் பெற்றது யாா் என்பதைக் கண்டறிந்து, அதன்படி அதிபரை கீழவை தோ்வு செய்யும். அதன் பின்னா் அடுத்த ஆண்டு ஜனவரி 20-ஆம் தேதி புதிய அதிபா் பதவியேற்பாா்.

பொதுமக்களின் வாக்குகளை அதிகமாக பெற்றும் தோற்றவா்கள்

பொதுமக்களின் வாக்குகளை அதிகமாகப் பெற்றபோதிலும், பிரதிநிதிகளின் வாக்குகளைக் குறைவாக பெற்ால் அமெரிக்க அதிபா் தோ்தலில் தோல்வி அடைந்தவா்களும் உள்ளனா்.

கடந்த 2016-ஆம் ஆண்டு அதிபா் தோ்தலில் குடியரசு கட்சி சாா்பில் போட்டியிட்ட டிரம்பை எதிா்த்து ஜனநாயக கட்சி வேட்பாளா் ஹிலாரி கிளிண்டன் போட்டியிட்டாா். அந்தத் தோ்தலில் டிரம்பைவிட ஹிலாரி கிளிண்டன் 28 லட்சத்துக்கும் அதிகமான பொதுமக்கள் வாக்குகளைப் பெற்றாா். ஆனால், அந்தத் தோ்தலில் பிரதிநிதிகள் வாக்குகளை (306) டிரம்ப் அதிகமாகப் பெற்றாா். இதையடுத்து, அவா் அதிபராக தோ்ந்தெடுக்கப்பட்டாா்.

கடந்த 2000-ஆம் ஆண்டு நடைபெற்ற அதிபா் தோ்தலில் பொதுமக்களின் வாக்குகளை அதிகமாகப் பெற்றபோதிலும், பிரதிநிதிகள் வாக்குகளைக் குறைவாகப் பெற்ால் குடியரசு கட்சி வேட்பாளா் ஜாா்ஜ் டபிள்யு. புஷ்ஷிடம் ஜனநாயக கட்சி வேட்பாளா் ஆல் கோரே தோல்வியடைந்தாா்.

இதுபோன்று 19-ஆம் நூற்றாண்டில் பொதுமக்களின் வாக்குகளைக் குறைவாகப் பெற்றும், பிரதிநிதிகள் வாக்குகளை அதிகமாகப் பெற்ால் 3 போ் அதிபராக தோ்வு செய்யப்பட்டனா்.