டோலிவுட்டில் துல்கர் சல்மானுக்கு கிட்டிய ‘ஹாட்ரிக்’ வெற்றி வாய்ப்புகள்!

இந்த வருடத்தின் துவக்கத்தில் மலையாளத்தில் வெளிவந்து சக்கைப் போடு போட்ட திரைப்படம் ‘ஜோமோண்டே சுவிசேஷங்கள்’ இத்திரைப்படத்தில் துல்கர் சல்மான் நாயகனாக நடித்திருக்க ஐஸ்வர்யா ராஜேஷ், அனுபமா பரமேஸ்வரன் என இரு நாயகிகள். வருடத்துவக்கத்தில் 45 கோடி ரூபாய் கலெக்‌ஷனை அள்ளிக் கொடுத்த இத்திரைப்படத்தின் இயக்குனர் சத்தியன் அந்திக்காடு. டோலிவுட்டைப் பொருத்தவரை மணிரத்னத்தின் ‘ஓ காதல் கண்மணி’  தெலுங்கில் ஓக்கே பங்காரம்’ ஆக டப் செய்யப்பட்ட வகையில் துல்கருக்கு கணிசமான அளவில் அங்கும் ரசிகர்கூட்டம் உண்டென்பதை இப்போது குறிப்பிட்டாக வேண்டும்.

அப்படத்தின் வாயிலாக டோலிவுட்டில் அடியெடுத்து வைத்த துல்கருக்கு அடுத்துக் கிடைத்த பெரிய வாய்ப்பு என்றால் அது நடிகை சாவித்ரியின் வாழ்க்கைச் சித்திரமான ‘மகாநதி’ யில் நாயகனான கதையைத் தான் சொல்ல வேண்டும். அத்திரைப்படத்தில் நடிகர் ஜெமினி கணேஷனின் வேடமேற்று நடித்துக் கொண்டிருப்பது துல்கர் தான். முதலிரண்டு வெற்றி வாய்ப்புகளைத் தொடர்ந்து மூன்றாவதாக தற்போது துல்கர் நடிப்பில் பரவலாக கவனம் பெற்ற வெற்றித் திரைப்படமான ‘ஜோமோண்டே சுவிசேஷங்கள்’ தெலுங்கில் 'அந்தமைன ஜீவிதம்' என்ற பெயரில் வெளியாகவிருக்கிறதாம்.  அந்தமைன ஜீவிதம் என்றால் தெலுங்கில் ‘அழகான வாழ்க்கை’ என்று பொருள்.